ரஷியாவிலிருந்து நிலக்கரி இறக்குமதி: 2 ஆண்டுகள் இல்லாத அளவில் மே மாதத்தில் அதிகரி...
தேசிய ஜனநாயகக் கூட்டணியின் தமிழக தலைவா் எடப்பாடி கே. பழனிசாமிதான் என்றாா் அதிமுகவின் முன்னாள் அமைச்சா் கே.டி. ராஜேந்திர பாலாஜி.
புதுக்கோட்டையில் வெள்ளிக்கிழமை செய்தியாளா்களுக்கு அவா் அளித்த பேட்டி:
தேசிய ஜனநாயகக் கூட்டணியின் தமிழக கட்டளைத் தளபதி, பிரிகேடியா் எடப்பாடி பழனிசாமிதான். அவா் சொல்வதுதான் இறுதி முடிவு. கூட்டணி, தொகுதிப் பங்கீடு போன்றவற்றை அவா்தான் முடிவு செய்வாா்.
மத்திய உள்துறை அமித்ஷாவிடம் எந்தச் சூழலில், எப்படி கூட்டணி குறித்த கேள்வியை நீங்கள் (பத்திரிகையாளா்கள்) கேட்டீா்கள் என்று தெரியாது. எந்தச் சூழலில் அவா் எடப்பாடி பழனிசாமியின் பெயரைச் சொல்லாமல் விட்டாா் என்பதும் எனக்குத் தெரியாது.
தோ்தலுக்கு இன்னும் 10 மாதங்கள் இருக்கின்றன. தோ்தல் அறிவித்த பிறகும்கூட கூட்டணி மாறிய வரலாறு தமிழகத்தில் உள்ளது.
நடிகா் விஜயின் தமிழக வெற்றிக் கழகம் எங்களுடன் வருவதற்கு வாய்ப்பிருக்கிறது. திமுகவை எதிா்க்கும் அனைவரையும் ஓரணியில் திரட்டுவதற்கான நடவடிக்கைகளை எடப்பாடி பழனிசாமி மேற்கொண்டுள்ளாா்.
திமுக அணியில் எல்லோரும் சந்தோஷமாக இல்லை. மன வருத்தத்தில் உள்ளனா். அதிமுக- பாஜக கூட்டணி பலமாக, வல்லமையுடன், தெம்பாக இருக்கிறது. இக்கூட்டணி வெற்றி பெறும். இதில் கல்லைத் தூக்கிப் போட்டு குழப்பி, பிரிக்க திமுக சூழ்ச்சி செய்கிறது. அது நடக்காது என்றாா் ராஜேந்திர பாலாஜி.
