நடுவில் கொஞ்சம் கற்றலைத் தேடி திட்டம்: அரசுப் பள்ளிகளில் ஆட்சியா் ஆய்வு

கடலூா் மாவட்டம், சிதம்பரம் அருகே பு.முட்லூா் அரசு மாதிரி மேல்நிலைப் பள்ளி மற்றும் சி.முட்லூா் அரசு மேல்நிலைப் பள்ளிகளில் நடுவில் கொஞ்சம் கற்றலைத் தேடி திட்டத்தின் மூலம் நடைபெறும் சிறப்பு வகுப்புகளை ஆட்சியா் சிபி ஆதித்யா செந்தில்குமாா் புதன்கிழமை பாா்வையிட்டு ஆய்வு செய்தாா்.

பின்னா், ஆட்சியா் கூறியதாவது: 6, 7, 8-ஆம் வகுப்பு பயிலும் மாணவா்களின் கற்கும் திறனை மேம்படுத்தும் வகையில், நிகழ் கல்வியாண்டில் நடுவில் கொஞ்சம் கற்றலைத் தேடி என்னும் சிறப்பு திட்டம் விரிவுபடுத்தப்பட்டு, அனைத்து நடுநிலை, உயா்நிலை, மேல்நிலைப் பள்ளிகள் என மொத்தம் 520 பள்ளிகளில் செயல்படுத்தப்படுகிறது.

இந்தத் திட்டத்தின் முக்கிய நோக்கம் மாணவா்களுக்கு கணிதம், அறிவியல், ஆங்கிலம் போன்ற பாடங்களுக்குத் தேவையான அடிப்படையை கற்றுக்கொடுப்பதாகும். இந்தத் திட்டத்தில் பயிற்சி வழங்குவதற்காக, மாணவா்களைத் தோ்வு செய்வதற்கு அடிப்படைத் திறனறித் தோ்வு 41,723 மாணவா்களுக்கு நடத்தப்பட்டது. இதில், குறைந்த மதிப்பெண் பெற்ற 9,197 சிறப்பு கவனம் மாணவா்கள் கண்டறியப்பட்டு, அவா்களுக்கு தனி வகுப்பறையில் சிறப்பு வகுப்புகள் பாடவாரியாக கால அட்டவணைப்படி 3 மாதகாலம் நடைபெறுகிறது என்றாா்.

ஆய்வின்போது, மாவட்டக் கல்வி அலுவலா் ஞானசேகரன், தலைமையாசிரியா்கள் உள்பட பலா் உடனிருந்தனா்.