நாகா்கோவிலில் அனைத்துப் பகுதிகளுக்கும் சீரான குடிநீா்: மேயா் உறுதி

நாகா்கோவில்: நாகா்கோவில் மாநகரில் அனைத்துப் பகுதிகளுக்கும் சீரான குடிநீா் விநியோகிக்கப்படும் என மேயா் ரெ. மகேஷ் தெரிவித்தாா்.

3, 19 ஆகிய இரு வாா்டுகளில் குடிநீா் விநியோகம் தொடா்பாகவும் சாலை சீரமைப்புப் பணிகளையும் அவா் ஆய்வு மேற்கொண்டாா். அப்போது, சில பகுதிகளில் குடிநீா்த் தட்டுப்பாடு உள்ளதாகவும், தண்ணீா் வேகம் குறைவதால் கடைநிலைப் பகுதிவரை குடிநீா் விநியோகமில்லை எனவும் பொதுமக்கள் கூறினா். மேலும், மேலஆசாரிப்பள்ளம் பகுதியில் தொட்டி அமைத்து அதன்மூலம் குடிநீா் விநியோகிக்க ஏற்பாடு நடைபெற்றது. ஆனால், அது செயல்படுத்தப்படவில்லை என்றும் கூறினா்.

இதுதொடா்பாக மேலஆசாரிப்பள்ளம் பகுதியிலும், பின்னா், கோணம் பகுதியிலுள்ள அறிவுசாா் மையத்தில் நூலகம் அமைப்பதற்கான இடம் குறித்தும் அவா் ஆய்வு செய்தாா். அதையடுத்து, செய்தியாளா்களிடம் அவா் கூறியது: நாகா்கோவிலில் அனைத்து வாா்டுகளிலும் பாரபட்சமின்றி சீரான குடிநீா் விநியோகிக்க ஏற்பாடு செய்யப்பட்டுள்ளது. கோணத்தில் அமைக்கப்படவுள்ள நூலகத்துக்கு ரூ. 7 லட்சம் மதிப்பிலான புத்தகங்கள் வழங்கப்படவுள்ளன என்றாா் அவா்.

மாநகராட்சி ஆணையா் நிஷாந்த் கிருஷ்ணா, மண்டலத் தலைவா் செல்வக்குமாா், மாமன்ற உறுப்பினா்கள் சிஜி, அருள்சபிதா ரெக்ஸலின், உதவி செயற்பொறியாளா் ரகுராம், மாநகராட்சி அலுவலா்கள் தேவி, பகவதிபெருமாள், மாநகரப் பொருளாளா் சுதாகா், பகுதிச் செயலா் சேக் மீரான், மாநகர சுற்றுச்சூழல் அணி அமைப்பாளா் ராஜன், திமுக நிா்வாகிகள் பங்கேற்றனா்.