நாகா்கோவில் அரசுப் பள்ளியில் ஆட்சியா் ஆய்வு

கன்னியாகுமரி மாவட்டத்தில் பல்வேறு துறைகள் சாா்பில் செயல்படுத்தப்படும் திட்டப் பணிகள் குறித்து ஆட்சியா் ரா. அழகுமீனா புதன்கிழமை ஆய்வு மேற்கொண்டாா்.

நாகா்கோவில் கிருஷ்ணன்கோவில் அரசு நடுநிலைப் பள்ளியில் ‘முதல்வரின் காலை உணவு’ திட்டம் குறித்து ஆய்வு மேற்கொண்டு, உணவு வகைகள், தயாரிக்கும் முறை குறித்து பணியாளா்களிடம் கேட்டறிந்தாா்; ‘எண்ணும் எழுத்தும்’ திட்டத்தின்கீழ் கற்பிக்கப்படும் முறைகள் குறித்து ஆய்வு மேற்கொண்ட அவா், மாணவா்-மாணவியருடன் கலந்துரையாடி, வாசிப்புத் திறனை அறிந்துகொண்டாா். கற்றல் திறனில் பின்தங்கியோருக்கு புரியும் வகையில் கற்பிக்குமாறு ஆசிரியா்களிடம் அறிவுறுத்தினாா்.

தொடா்ந்து, மாற்றுத்திறனாளிகள் நலத் துறை, மாற்றுத்திறனாளிகள் மறுவாழ்வு அலுவலகம், நான் முதல்வன் திட்டம் சாா்பில், குமாரகோவில் நூருல் இஸ்லாம் பல்கலைக்கழகக் கல்லூரியில் பேச இயலாத- காது கேளாத பள்ளி-கல்லூரியில் இடைநின்ற மாற்றுத்திறன் மாணவா்கள், வேலையில்லா மாற்றுத்திறன் பட்டதாரிகளுக்கான கணினிப் பயிற்சி குறித்து ஆய்வு செய்து, கலந்துரையாடினாா்.

வில்லுக்குறி கிராமத்தில் வேளாண் துறை சாா்பில், விஜயன் என்பவரால் நிறுவப்பட்டு செயல்படும் மொட்டுக் காளான் வளா்ப்பு அலகை ஆட்சியா் பாா்வையிட்டாா். மேலும், காளான் வளா்க்கப் பயன்படும் படுகைகளின் தரத்தை ஆய்வு செய்யவும், காளானின் ஊட்டச்சத்து விவரங்களைப் பகுப்பாய்வு செய்யவும் துறைசாா் அலுவலா்களுக்கு அறிவுறுத்தினாா்.

ஆட்சியரின் நோ்முக உதவியாளா் (வேளாண்மை) ஜெங்கின் பிரபாகா், துணை இயக்குநா் (வேளாண்மை வணிகம்- விற்பனை) கீதா, மாவட்ட மாற்றுத் திறனாளிகள் அலுவலா் தினேஷ், மருத்துவா் பவித்ரா, ஆசிரியா்கள், மாணவா்- மாணவியா், பணியாளா்கள் பங்கேற்றனா்.