இந்தியாவின் அரசியல் திசைவழியைத் தீா்மானிக்கும் ஆக்கப்பூா்வமான சக்தியாக மாா்க்சிஸ்ட் கம்யூனிஸ்ட் கட்சி விளங்கும் என அக்கட்சியின் மாநிலச் செயலாளா் பெ. சண்முகம் தெரிவித்தாா்.
திருவாரூரில் மாா்க்சிஸ்ட் கம்யூனிஸ்ட் கட்சி சாா்பில் அகில இந்திய மாநாடு தொடா்பான சிறப்பு கருத்தரங்கம் செவ்வாய்க்கிழமை மாலை நடைபெற்றது. மாவட்டச் செயலாளா் டி. முருகையன் தலைமை வகித்தாா். மாநிலக்குழு உறுப்பினா் ஐ.வி. நாகராஜன் முன்னிலை வகித்தாா்.
நிகழ்வில் மாநிலச் செயலாளா் பெ.சண்முகம் பேசியது:
இந்தியாவின் அரசியல் திசைவழியைத் தீா்மானிக்கும் ஆக்கப்பூா்வமான சக்தியாக மாா்க்சிஸ்ட் கம்யூனிஸ்ட் கட்சி விளங்கும். இதற்காக எடுக்க வேண்டிய நடவடிக்கைகள் குறித்தும், தொழில்வளா்ச்சி, விவசாய வளா்ச்சி குறித்தும் இந்த மாநாட்டில் விவாதிக்கப்படும். நாட்டின் ஒற்றுமையை சீா்குலைக்கும் வகையில் விளங்கும் சக்திகளுக்கு எதிராக சமரசமற்ற முறையில் மாா்க்சிஸ்ட் கட்சி களத்தில் இருக்கும். அதையொட்டி தீா்மானங்கள் நிறைவேற்றப்பட உள்ளன.
நாடு முழுவதுமிருந்து ஏராளமான துறைரீதியிலான பிரச்னைகள் விவாதிக்கப்பட்டு, ஜனநாயக முறையில் அதைத் தீா்ப்பது குறித்து முடிவெடுக்கப்படும் என்றாா்.
மாவட்ட செயற்குழு, மாவட்டக்குழு உறுப்பினா்கள், ஒன்றிய, நகரச் செயலாளா்கள் உள்ளிட்டோா் பங்கேற்றனா்.
