நாமக்கல்லில் மக்கள் குறைதீா் கூட்டம்: ரூ. 8.17 லட்சம் மதிப்பில் நலத் திட்ட உதவி அளிப்பு

நாமக்கல்: நாமக்கல் ஆட்சியா் அலுவலக கூட்ட அரங்கில், மக்கள் குறைதீா் கூட்டம் ஆட்சியா் ச.உமா தலைமையில் திங்கள்கிழமை நடைபெற்றது.

இதில், முதியோா், விதவையா், கல்வி உதவித்தொகை, இலவச வீட்டுமனைப் பட்டா, வங்கிக் கடன் உதவி, குடிசை மாற்று வாரிய வீடு, குடிநீா் வசதி, சாலை வசதி உள்ளிட்ட அடிப்படை வசதிகள் வேண்டியும், பல்வேறு கோரிக்கைகள் தொடா்பாகவும் மொத்தம் 385 மனுக்களை ஆட்சியரிடம் வழங்கினா். அவற்றைப் பெற்று கொண்டு பரிசீலனை செய்து உரிய அலுவலா்களிடம் வழங்கி நடவடிக்கை எடுக்க ஆட்சியா் உத்தரவிட்டாா்.

இதனைத் தொடா்ந்து, கூட்டுறவுத் துறை, சாா்பில் 4 பயனாளிகளுக்கு ரூ. 7.85 லட்சம் சாா்பில் பயிா்க்கடன், மாற்றுத் திறனாளிகள் நலத்துறை சாா்பில், இருவருக்கு தலா ரூ. 15,750 வீதம் ரூ. 31,500 மதிப்பில் சக்கர நாற்காலிகள், ஒருவருக்கு முதலமைச்சரின் விரிவான மருத்துவ காப்பீடு திட்ட அட்டை என மொத்தம் 7 பயனாளிகளுக்கு ரூ.8.17 லட்சம் மதிப்பில் நலத்திட்ட உதவிகளை ஆட்சியா் வழங்கினாா். இந்த நிகழ்ச்சியில், தனித்துணை ஆட்சியா் (சமூக பாதுகாப்புத் திட்டம்) ச.பிரபாகரன், மாற்றுத் திறனாளிகள் நல அலுவலா் கலைச்செல்வி மற்றும் துறை சாா்ந்த அலுவலா்கள் கலந்து கொண்டனா்.

படவரி...

என்கே-12-ஜிடிபி

நாமக்கல் ஆட்சியா் அலுவலகத்தில் மாற்றுத் திறனாளிகளுக்கு சக்கர நாற்காலிகளை வழங்கிய ஆட்சியா் ச.உமா.