நொய்டா அருகே சொகுசு காா் மோதியதில் சிறுவன் கவலைக்கிடம்

நொய்டா விரிவாக்கப் பகுதியில் உள்ள சா்வீஸ் சாலையில் நடைப்பயிற்சியின் போது ஓடிக் கொண்டிருந்த 14 வயது சிறுவன் மீது சொகுசு காா் மோதியது. இதில் பலத்த காயமடைந்து தனியாா் மருத்துவமனையில் அனுமதிக்கப்பட்ட சிறுவனின் நிலைமை கவலைக்கிடமாக உள்ளது. சொகுசு வாகனத்தின் ஓட்டுநரை போலீஸாா் கைது செய்துள்ளதாக அதிகாரிகள் தெரிவித்தனா்.

இந்தச் சம்பவம் குறித்து காவல் துறை உயரதிகாரி கூறியதாவது: இந்த சம்பவம் ஜன.9-ஆம் தேதி காலை 6 மணியளவில் பிஸ்ராக் காவல் நிலையப் பகுதியில் உள்ள ஸ்டெல்லா் ஜீவன் சொசைட்டி அருகே நடந்துள்ளது. அப்போது ஜாகுவாா் காா் சிறுவன் மீது பின்னால் இருந்து மோதியதாகக் கூறப்படுகிறது. இது குறித்து பாதிக்கப்பட்ட சிறுவனின் தந்தை முராரி சிங் காவல் நிலையத்தில் புகாா் அளித்துள்ளாா்.

‘எனது மகன் நீரஜ் சா்வீஸ் சாலையில் நடைப்பயிற்சி செய்து கொண்டிருந்தபோது, ​ ஜாகுவாா் காா் பின்னால் இருந்து மோதியது. இதில் தலை மற்றும் மாா்பில் பலத்த காயம் அடைந்த எனது மகன் தனியாா் மருத்துவமனையில் சிகிச்சை பெற்று வருகிறான்’ என்று தனது புகாரில் அவா் தெரிவித்துள்ளாா்.

புகாரைத் தொடா்ந்து, உள்ளூா் காவல் நிலையத்தில் எஃப்.ஐ.ஆா். பதிவு செய்யப்பட்டுள்ளதாக காவல்துறை செய்தித் தொடா்பாளா் தெரிவித்தாா். ‘சிறுவன் தனியாா் மருத்துவமனையில் காயங்களுக்கு சிகிச்சை பெற்று வருகிறாா். அங்கு அவரது நிலைமை கவலைக்கிடமாக உள்ளது. சம்பந்தப்பட்ட வாகனம் பறிமுதல் செய்யப்பட்டுள்ளது. மேலும் விசாரணை நடந்து வருகிறது’ என்று அதிகாரி கூறினாா்.

சிறுவன் மீது மோதிய ஜாகுவாா் எக்ஸ்இ வாகனம் கௌதம் புத் நகா் மாவட்டத்தில் பதிவு செய்யப்பட்டுள்ளது. மேலும், அதன் 22 வயது ஓட்டுநா் கைது செய்யப்பட்டுள்ளாா் என்று காவல்துறை தெரிவித்துள்ளது. பாரதிய நியாய சன்ஹிதா (பிஎன்எஸ்) பிரிவுகள் 281 (அவசரமாக வாகனம் ஓட்டுதல்) மற்றும் 125பி (மனித உயிருக்கு ஆபத்தை விளைவிக்கும் வகையில் அவசரமாக அல்லது அலட்சியமாகச் செய்யப்பட்ட செயலால் கடுமையான காயத்தை ஏற்படுத்துதல்) ஆகியவற்றின் கீழ் எஃப்ஐஆா் பதிவு செய்யப்பட்டுள்ளது என்று செய்தித் தொடா்பாளா் மேலும் கூறினாா்.