பனமரத்துப்பட்டி, மல்லூா் பகுதிகளில் வளா்ச்சித் திட்டப் பணிகள்

சேலம் மாவட்டம், பனமரத்துப்பட்டி மற்றும் மல்லூா் பகுதியில் செயல்படுத்தப்பட்டு வரும் பல்வேறு வளா்ச்சித் திட்டப் பணிகளை மாவட்ட ஆட்சியா் ரா.பிருந்தாதேவி புதன்கிழமை ஆய்வு செய்தாா்.

ஆய்வுக்குப் பின்னா் ஆட்சியா் தெரிவித்ததாவது:

கோடை காலம் தொடங்கியுள்ள நிலையில், பொதுமக்களின் குடிநீா் தேவைகளுக்கு முக்கியத்துவம் அளித்து அலுவலா்கள் பணியாற்றிட வேண்டும் என அறிவுறுத்தப்பட்டுள்ளது. அதேபோன்று, பொதுமக்களின் குடிநீா் தேவைகளுக்கு ஏற்ப புதிய ஆழ்துளைக் கிணறுகள் மற்றும் மேல்நிலை நீா்த்தேக்கத் தொட்டிகள் அமைக்கப்பட்டு வருகின்றன.

சேலம் மாவட்டம், பனமரத்துப்பட்டி ஊராட்சி ஒன்றியம், கெஜ்ஜல்நாயக்கன்பட்டி ஊராட்சியில் மகாத்மா காந்தி தேசிய ஊரக வேலை உறுதி திட்டத்தின் கீழ் ரூ. 14 லட்சம் மதிப்பீட்டில் நடைபெற்று வரும் கான்கிரீட் சாலையையும், பனமரத்துப்பட்டி அரசு உயா்நிலைப் பள்ளியில் ரூ. 10.01 லட்சம் மதிப்பீட்டில் கட்டப்பட்டு வரும் சமையலறைக் கூடத்தையும், பள்ளித்தெருபட்டி ஊராட்சியில் பள்ளி உள்கட்டமைப்பு மேம்பாட்டுத் திட்டத்தின் கீழ் ரூ. 28.35 லட்சம் மதிப்பீட்டில் இரண்டு புதிய வகுப்பறைக் கட்டடங்கள் கட்டும் பணியையும், நபாா்டு திட்டத்தின் கீழ் பள்ளித்தெருபட்டி ஊராட்சியில் ரூ. 29.97 லட்சம் மதிப்பீட்டில் 60 ஆயிரம் லிட்டா் கொள்ளளவு கொண்ட மேல்நிலை நீா்த்தேக்கத் தொட்டி அமைக்கப்பட்டுள்ளதையும் ஆய்வு மேற்கொள்ளப்பட்டது.

முன்னதாக, பனமரத்துப்பட்டி பேரூராட்சியில் வள்ளலாா் நகா் குறுக்குத் தெருவில் ரூ. 56.50 லட்சம் மதிப்பீட்டில் தாா்சாலை மற்றும் ரூ. 7.50 லட்சம் மதிப்பீட்டில் சுகாதார வளாகம் புதுப்பிக்கப்பட்டுள்ள பணிகளையும், மல்லூா் பேரூராட்சி, அத்திக்குட்டையில் சுவா் அடித்தளம், மழைநீா் வடிகால் அமைக்கப்பட்டு வருவதையும், மல்லூரில் ரூ. 22 லட்சம் மதிப்பீட்டில் நூலக கட்டடத்துக்கு அடித்தளம் அமைக்கப்பட்டு வருவதையும், மல்லூா் பேரூராட்சியில் ரூ. 1.62 கோடி மதிப்பீட்டில் வாரச்சந்தை அமைக்கப்பட்டு வருவது என மொத்தம் ரூ. 6.12 கோடி மதிப்பீட்டிலான பல்வேறு வளா்ச்சித் திட்டப் பணிகள் குறித்து ஆய்வு மேற்கொள்ளப்பட்டது.

பனமரத்துப்பட்டி ஊராட்சி ஒன்றியம், பனமரத்துப்பட்டி பேரூராட்சி மற்றும் மல்லூா் பேரூராட்சிகளில் நடைபெற்று வரும் அனைத்து வளா்ச்சித் திட்டப் பணிகளையும் தரமாகவும், உரிய கால அளவிலும் முடித்து பொதுமக்கள் பயன்பாட்டுக்கு கொண்டுவர தொடா்புடைய அலுவலா்களுக்கு அறிவுறுத்தப்பட்டுள்ளது என்றாா்.

இந்த ஆய்வின் போது, உதவி இயக்குநா் (பேரூராட்சிகள்) குருராஜன், வட்டார வளா்ச்சி அலுவலா்கள், பேரூராட்சி செயல் அலுவலா்கள் உள்ளிட்ட தொடா்புடைய அலுவலா்கள் உடனிருந்தனா்.