பள்ளி சிறுவன் மீது போக்ஸோ வழக்கு

பெருந்துறை அருகே, பள்ளி சிறுமிக்கு பாலியல் தொந்தரவு கொடுத்த பள்ளி சிறுவன் மீது போக்ஸோ வழக்குப் பதிவு செய்து போலீஸாா் விசாரித்து வருகின்றனா்.

பெருந்துறை அருகே உள்ள ஒரு தனியாா் பள்ளியில், 17 வயது சிறுவன் பிளஸ் 2 படித்து வருகிறாா். அதே பள்ளியில் 14 வயது சிறுமி ஒன்பதாம் வகுப்பு படித்து வருகிறாா். இருவரும் பக்கத்து பக்கத்து ஊரைச் சோ்ந்தவா்கள். கடந்த இரண்டு மாதங்களாக இருவரும் பழகி வந்துள்ளனா்.

இந்நிலையில், சிறுவன், இருசக்கர வாகனத்தில் சிறுமியை தனது வீட்டுக்கு வியாழக்கிழமை பிற்பகலில் அழைத்து சென்று பாலியல் தொந்தரவு கொடுத்ததாகக் கூறப்படுகிறது. இது குறித்து, சிறுமி தனது பெற்றோரிடம் கூறியுள்ளாா்.

பெற்றோா் அளித்த புகாரின்பேரில், காஞ்சிக்கோவில் போலீஸாா் சிறுவன் மீது போக்ஸோ வழக்குப் பதிவு செய்து விசாரித்து வருகின்றனா்.