பாகிஸ்தானுக்கு எதிரான 2-வது டெஸ்ட் போட்டியில் 18 வயதுடைய இளம் வீரருக்கு வாய்ப்பு வழங்கப்பட்டுள்ளது.
தென்னாப்பிரிக்காவில் சுற்றுப்பயணம் மேற்கொண்டுள்ள பாகிஸ்தான் அணி இரண்டு டெஸ்ட் போட்டிகள் கொண்ட தொடரில் விளையாடி வருகிறது. இந்தத் தொடரில் முதல் போட்டியில் தோல்வியைத் தழுவும் தருவாயில் இருந்த தென்னாப்பிரிக்க அணி பின்வரிசையில் பேட்டிங் செய்த பந்துவீச்சாளர்களின் அதிரடியால் 2 விக்கெட்டுகள் வித்தியாசத்தில் வெற்றிபெற்று உலக டெஸ்ட் சாம்பியன்ஸிப் இறுதிப்போட்டிக்கு முன்னேறியுள்ளது.
இதனால், இரண்டாவது டெஸ்ட் போட்டி ஒரு சம்பிரதாயத்துக்காக மட்டுமே பார்க்கப்படுகிறது. இருப்பினும், தொடரை சமன் செய்வதற்கு பாகிஸ்தான் அணி வென்றாக வேண்டிய கட்டாயத்தில் இருக்கிறது.
இந்த நிலையில், பாகிஸ்தானுக்கு எதிரான 2-வது போட்டிக்கு தென்னாப்பிரிக்க அணி அறிவிக்கப்பட்டுள்ளது. அணியில் மூன்று மாற்றங்களுடன் 18 வயதான குவேனா மபாகாவுக்கு அணியில் வாய்ப்பு வழங்கப்பட்டுள்ளது. தொடக்க ஆட்டக்காரர் டோனி டி ஜோர்ஜி இடது தொடை காயத்தால் விலகியுள்ளார்.
அவருக்குப் பதிலாக ஆல் ரவுண்டர் வியான் முல்டர் அணியில் இணைந்துள்ளார். ரியான் ரிக்கெல்டன் தொடக்க ஆட்டக்காரராக களமிறங்குகிறார். காயத்தால் விலகியிருந்த கேசவ் மகராஜ் மீண்டும் அணிக்குத் திரும்பியுள்ளார். குவேனா மபாகா முதல் தரப் போட்டிகளில் இதுவரை 60.5 ஓவர்கள் பந்துவீசியுள்ளார்.
இவ்விரு அணிகளும் மோதும் இரண்டாவது டெஸ்ட் போட்டி நாளை(ஜன.3) நியூலேண்டில் இந்திய நேரப்படி 2 மணிக்குத் தொடங்குகிறது.
தென்னாப்பிரிக்க அணி:
எய்டன் மார்க்ரம், ரியான் ரிக்கல்டன், வியான் முல்டர், டிரிஸ்டன் ஸ்டப்ஸ், டெம்பா பவுமா (கேப்டன்), டேவிட் பெடிங்காம், கைல் வெர்ரேய்ன் (விக்கெட் கீப்பர்), மார்கோ ஜான்சன், கேசவ் மகராஜ், ககிசோ ரபாடா, குவேனா மபாகா.
