திருநெல்வேலி அருகே உள்ள பிராஞ்சேரியில் பாத யாத்திரை சென்ற பக்தா் கொலை செய்யப்பட்ட வழக்கில், 3 பேருக்கு ஆயுள் தண்டனை விதித்து, திருநெல்வேலி நீதிமன்றம் செவ்வாய்க்கிழமை தீா்ப்பளித்தது.
அம்பாசமுத்திரம் அருகே உள்ள வாகைகுளத்தைச் சோ்ந்தவா் செல்வராஜ். இவருக்கும், அதே ஊரைச் சோ்ந்த கிருஷ்ணன் குடும்பத்தினருக்கும் முன்பகை இருந்து வந்தது. கடந்த 2013 இல் வாகைகுளத்தில் இருந்து திருச்செந்தூா் நோக்கி பாதயாத்திரையாக செல்வராஜ் சென்று கொண்டிருந்தாா்.
பிராஞ்சேரி அருகே வந்ததும் சக பக்தா்களுக்கு உணவுப் பரிமாறிக் கொண்டிருந்தாராம். அப்போது, திடீரென வந்த கும்பல் செல்வராஜை வெட்டிக் கொலை செய்தது. இதுதொடா்பாக, முன்னீா்பள்ளம் காவல் நிலைய போலீஸாா் வழக்குப் பதிந்து வாகைகுளம் பேச்சியம்மன் கோயில் தெருவைச் சோ்ந்த கிருஷ்ணன் (43), அதே கிராமத்தைச் சோ்ந்த விஜய் (20), சவரிமுத்து (27), கௌதமபுரியைச் சோ்ந்த பாக்கியராஜ் ஆகியோரை கைது செய்தனா்.
இந்த வழக்கு திருநெல்வேலி மாவட்ட முதலாவது கூடுதல் அமா்வு நீதிமன்றத்தில் நடைபெற்று வந்தது. வழக்கு நடைபெறும்போது கிருஷ்ணன் உயிரிழந்துவிட்டாா். வழக்கு விசாரணை முடிவுற்ற நிலையில், நீதிபதி செல்வம் செவ்வாய்க்கிழமை தீா்ப்பளித்தாா். அதில், குற்றஞ்சாட்டப்பட்ட சவரிமுத்து, பாக்கியராஜ், விஜய் ஆகியோருக்கு ஆயுள் தண்டனையும், தலா ரூ. 10,000 அபராதமும் விதித்து உத்தரவிட்டாா். அபராதத் தொகையைக் கட்டத் தவறினால், கூடுதலாக ஓராண்டு சிறைத் தண்டனை அனுபவிக்கவும் உத்தரவிட்டாா். போலீஸ் தரப்பில் அரசு வழக்குரைஞா் கருணாநிதி ஆஜரானாா்.
