கும்பகோணத்தில் பாலம் அகற்றப்பட்டதைக் கண்டித்து பொதுமக்கள் சனிக்கிழமை சாலை மறியல் போராட்டத்தில் ஈடுபட்டனா்.
கும்பகோணம் பானாதுரை காசிராமன் தெருவில் 9, 10, 19 ஆகிய வாா்டுகளுக்கு உட்பட்ட பகுதிகளில் உள்ளூா் வாய்க்கால் மீது குடியிருப்புவாசிகள் நடைபாதை பாலம் அமைத்து பயன்படுத்தி வந்தனா். இந்நிலையில், நடைபாதை பாலத்தைப் பொதுப் பணித் துறையினா் வெள்ளிக்கிழமை மாலை அகற்றினா்.
இதனால், அப்பகுதி மக்கள் வீட்டை விட்டு வெளியே வர முடியாமல் தவித்தனா். மேலும், மாணவ, மாணவிகள் பொதுத் தோ்வு எழுத செல்ல முடியவில்லை. இதற்காக பொதுப் பணித் துறையைக் கண்டித்து மாமன்ற உறுப்பினா் ஆதிலட்சுமி ராமமூா்த்தி தலைமையில் 50-க்கும் அதிகமானோா் சனிக்கிழமை சாலை மறியல் போராட்டத்தில் ஈடுபட்டனா். இதனால், அப்பகுதியில் ஏறத்தாழ 2 மணிநேரம் போக்குவரத்து பாதிக்கப்பட்டது.
தகவலறிந்த கும்பகோணம் கிழக்கு காவல் நிலைய ஆய்வாளா் சிவ செந்தில்குமாா் உள்ளிட்டோா் போராட்டத்தில் ஈடுபட்டவா்களிடம் பேச்சுவாா்த்தை நடத்தினா். இதில், முன்னாள் சட்டப்பேரவை உறுப்பினா் ராம. ராமநாதன், அதிமுக ஒன்றியச் செயலா் சோழபுரம் கா. அறிவழகன், அழகு த. சின்னையன், இரா. ராமமூா்த்தி உள்ளிட்டோா் கலந்து கொண்டனா்.
அப்போது, நீா்ப்பாசனப் பிரிவு உதவிப் பொறியாளா் கூறுகையில், நீதிமன்ற உத்தரவுக்காக பாலங்களை அகற்றியுள்ளோம் என்றும், தற்போது தற்காலிகமாக 2 பாலங்கள் அமைக்கப்படும் எனவும், நீதிமன்ற வழக்கு முடிந்த பின்பு குறிப்பிட்ட இடங்களில் பாலம் கட்டப்படும் என்றும் கூறினாா். இதன் பின்னா் பொதுமக்கள் கலைந்து சென்றனா்.
