பாலியல் சீண்டல்களை தடுக்க விழிப்புணா்வு வேண்டும்: கிராமசபைக் கூட்டத்தில் ஆட்சியா் பேச்சு!

திருவிடைமருதூா் ஒன்றியம், திருச்சேறை ஊராட்சியில் ஞாயிற்றுக்கிழமை நடைபெற்ற கிராம சபை கூட்டத்தில், பாலியல் சீண்டல்களை தடுக்க பெண்களிடம் விழிப்புணா்வு வேண்டும் என்று பேசினாா் மாவட்ட ஆட்சியா் பா.பிரியங்கா பங்கஜம்.

திருச்சேறை ஊராட்சியில் கிராமசபை கூட்டம் திரெளபதி அம்மன் கோயில் வளாகத்தில் நடைபெற்றது. கூட்டத்தில் ஆட்சியா் பேசியது, மகளிா் திட்டம் மூலம் மட்டுமே பெண்கள் கடன்பெற வேண்டும் தனியாா் நிறுவனங்களை நாடக் கூடாது. திருவிடைமருதூா் பகுதியில் 30 போக்சோ வழக்குகள் பதிவு செய்யப்பட்டுள்ளது.

பாலியல் சீண்டல் பற்றி பொதுமக்களிடையே விழிப்புணா்வு வேண்டும். இந்த பகுதியில் 6 குழந்தை திருமணங்கள் நடைபெற்றுள்ளது. இனி வரும் காலங்களில் அதை தடுக்க வேண்டும் என்றாா். ஏஜிஎம்டி திட்டத்தின் கீழ் ரூ. 39.5 லட்சம் திட்டப்பணிகள் தோ்வு செய்யப்பட்டது உள்ளிட்ட 20 தீா்மானங்கள் நிறைவேற்றப்பட்டன.

கிராம சபை கூட்டத்தில் கும்பகோணம் உதவி ஆட்சியா் ஹிருத்யா எஸ். விஜயன், வட்டார வளா்ச்சி அலுவலா்கள் க. முருகேசன், எம். ஆனந்தராஜ் உள்ளிட்டோா் பேசினா். முன்னதாக ஊராட்சி செயலா் கே. ராஜ்குமாா் வரவேற்றாா்.