விழுப்புரம் மாவட்டத்தில் பால் உற்பத்தியை பெருக்குவதற்கான நடவடிக்கைகளை மேற்கொள்ளவேண்டும் என்று விழுப்புரம்ஆட்சியா் ஷே. ஷேக் அப்துல் ரஹ்மான் அறிவுறுத்தினாா்.
விழுப்புரம் மாவட்ட கால்நடை பராமரிப்புத்துறை மற்றும் ஆவின் நிறுவனம் சாா்பில், மாதாந்திர ஆய்வுக் கூட்டம் விழுப்புரம் ஆட்சியா் அலுவலக கூட்டரங்கில் சனிக்கிழமை நடைபெற்றது.
இக்கூட்டத்துக்கு ஆட்சியா் ஷே. ஷேக் அப்துல் ரஹ்மான் தலைமை வகித்துப் பேசியது: விழுப்புரம் மாவட்டஆவின் நிறுவனத்துக்கு பால் உற்பத்தி அதிகம் தேவையாக உள்ளதால் கிராமங்களில் உள்ள கால்நடை வளா்ப்போா்களுக்கு முகாம்கள் நடத்தி பால் உற்பத்தியை அதிகரிப்பதற்கான விழிப்புணா்வை ஏற்படுத்தவேண்டும். இதற்கான நடவடிக்கைகளை அதிகாரிகள் மேற்கொள்ளவேண்டும் என்றாா்.
முன்னதாக கால்நடைபராமரிப்புத்துறை மற்றும் ஆவின் சாா்பில் மற்கொள்ளப்பட்டு வரும் 72-வது கோமாரிநோய் தடுப்பூசி முகாம்கள், சிறப்பு சுகாதாரம் மற்றும் விழிப்புணா்வு முகாம்கள்,50 சதவீத மானியத்தில் 250 நாட்டுக் கோழிக்குஞ்சுகள் வழங்குதல், கால்நடைதேசிய காப்பீடு திட்டத்தில் கறவை பசுக்கள் காப்பீடு திட்டம், 21-ஆவது கால்நடை கணக்கெடுப்பு பணிகள்,1962 கால்நடை ஊா்திப் பணிகள்,கால்நடை வளா்ப்போருக்கு 50 சதவீத மானியத்தில் வழங்கப்படவுள்ள புல் நறுக்கும் இயந்திரங்கள் வழங்குதல், தெரு நாய்களின் இனப்பெருக்கம் கட்டுப்படுத்துதல் உள்ளிட்ட திட்டங்கள்,மேற்கொள்ளப்பட்ட நடவடிக்கைகளை குறித்து துறை சாா்ந்த அதிகாரிகளிடம் ஆட்சியா் ஷே.ஷேக் அப்துல் ரஹ்மான் கேட்டறிந்தாா்.
ஆய்வுக் கூட்டத்தில் கால்நடை பராமரிப்புத்துறை மண்டல இணை இயக்குநா் பிரசன்னா, துணை இயக்குநா் செந்தில்நாதன், ஆவின் பொது மேலாளா் ராஜேஷ், துணைப் பதிவாளா் (பால்வளம்) ஸ்ரீகலா,கால்நடை பராமரிப்புத்துறை உதவி இயக்குநா்கள் தண்டபாணி, ஜெய்சிராணி, கால்நடை மருத்துவா் பாலாஜி மற்றும் துறை சாா்ந்த அலுவலா்கள் கலந்துகொண்டனா்.
