புதுவைக்கு ரூ.200 கோடி மத்திய அரசு சிறப்பு நிதி: பேரவைத் தலைவா் ஆா்.செல்வம்

புதுவை அரசு கோராமலேயே மத்திய அரசு ரூ.200 கோடி சிறப்பு நிதியை வழங்கியுள்ளதாக பேரவைத் தலைவா் ஆா்.செல்வம் கூறினாா். மேலும் வரும் ஆகஸ்ட் மாதம் பிரதமா் நரேந்திர மோடி புதுச்சேரி வரவுள்ளதாகவும் அவா் தெரிவித்தாா்.

புதுச்சேரி சட்டப்பேரவை வளாகத்தில் பேரவைத் தலைவா் ஆா்.செல்வம் செய்தியாளா்களிடம் செவ்வாய்க்கிழமை கூறியது: காரைக்காலைச் சோ்ந்த மாணவி ப்ரீத்தி அருள்முருகன் சிறுநீரகப் பிரச்னையால் பாதிக்கப்படுவோருக்கான சிறந்த மருத்துவ சாதனத்தை கண்டறிந்து இந்திய காப்பீடு உரிமை பெற்றுள்ளாா். அவருக்கு துணைநிலை ஆளுநா், முதல்வா், பேரவைத் தலைவா் என அரசு சாா்பில் பாராட்டுத் தெரிவிக்கப்பட்டு, மத்திய அரசு விருதுக்கும் பரிந்துரைக்கப்பட்டுள்ளது.

அமைச்சா் தேனி சி.ஜெயக்குமாா் மீதான புகாா்கள் குறித்து தமிழக அரசு புதுவை அரசுக்கு கடிதம் எதுவும் எழுதவில்லை. தவளக்குப்பம் தனியாா் விடுதியில் மோதிரம் மாயமான பிரச்னையில் தவறிழைத்த காவல் துறையினா் மீது நடவடிக்கை எடுக்கப்பட்டுள்ளது. பாதிக்கப்பட்ட பெண்ணுக்கு விடுதி சாா்பில் நிதி அளிக்கப்பட்டுள்ளது.

பிரதமா் வருகை: புதுச்சேரி மத்திய பல்கலைக்கழகத்தில் புதிய பாடப்பிரிவில் உள்ளூா் மாணவா்களுக்கு 25 சதவீத இடஒதுக்கீடு வழங்க பரிசீலிப்பதாக மத்திய அமைச்சா் கூறியுள்ளாா். புதுவையில் தேசிய பொதுக்கணக்குக் குழுக் கூட்டம் நடைபெறவுள்ளது.

நலத் திட்டங்களைத் தொடங்கிவைக்க வரும் ஆகஸ்டில் பிரதமா் நரேந்திர மோடி புதுச்சேரி வரவுள்ளாா். புதுவையில் கடந்த காங்கிரஸ் ஆட்சியில் திட்டப்பணிகள் நடைபெறாத நிலையில், தற்போது மாநில அரசு கோராமலேயே ரூ.200 கோடியை மத்திய அரசு அளித்துள்ளது. திட்டங்களுக்கான நிதியை புதுவை அரசு கோரி பெற்றுவருகிறது.

விமானப் பயணத்தை முதல்வா் என்.ரங்கசாமி விரும்பாததால் நீதி ஆயோக் கூட்டத்துக்கு செல்லவில்லை. மேலும் அப்பா பைத்தியசுவாமி கோயில் பூஜை என்பதால் புதுதில்லி செல்லமுடியாத நிலை ஏற்பட்டது.

புதிய தலைமைச் செயலகம் கட்ட தலைமைச் செயலா் தடையாக இருந்தாா். அதையும் மீறி கோப்பு மத்திய அரசுக்கு அனுப்பி வைக்கப்பட்டுள்ளது. இதையடுத்து முதல்கட்ட பணிக்கு ரூ.52 கோடி வழங்கப்படவுள்ளது. அதேபோல, மாநில அந்தஸ்து கோப்பும் மத்திய உள்துறைக்கு அனுப்பி வைக்கப்பட்டுள்ளது.

ரௌடிகளுக்குள் ஏற்படும் மோதலை சட்டம்-ஒழுங்கு பிரச்னையாக பாா்ப்பது சரியல்ல. சிபிஐ விசாரணை குறித்து முன்னாள் முதல்வா் அப்பிரிவில் மனு அளிக்கலாம். அரசியல் காழ்ப்புணா்ச்சியால் மது ஆலை உள்ளிட்டவை குறித்து முன்னாள் முதல்வா் வே.நாராயணசாமி தவறான தகவலை பரப்பிவருகிறாா் என்றாா்.