புதுவையில் நியாயவிலைக் கடைகள் மூலம் தீபாவளிக்கு இலவசமாக 5 பொருள்கள்: மாநில அரசு ஏற்பாடு

புதுவையில் தீபாவளிக்கு நியாயவிலைக் கடைகளில் இலவசமாக சா்க்கரை, சன்பிளவா் எண்ணெய், கடலைப் பருப்பு, ரவை, மைதா அடங்கிய தொகுப்பு பை தர மாநில அரசு திட்டமிட்டுள்ளது.

இதனால் நான்கு பிராந்தியங்களிலும் 3.45 லட்சம் குடும்ப அட்டைதாரா்கள் பயன் பெறுவா்.

கடந்த மூன்று மாதங்களாக ரேஷனில் அரிசி தரப்படவில்லை. விரைவில் ரேஷனில் விடுபட்ட அனைத்து மாதங்களுக்கும் சோ்த்து இலவச அரிசியை தர அரசு நடவடிக்கை எடுத்து வருகிறது. இந்நிலையில் புதுவையில் தீபாவளிக்கு இலவச பொருள்கள் வழங்க அரசு திட்டமிட்டுள்ளது. இதற்கான அனைத்து பணிகளையும் கான்பெட் கூட்டுறவு நிறுவனம் செய்து வருகிறது.

இது தொடா்பாக புதுச்சேரி கூட்டுறவு நுகா்வோா் கூட்டமைப்பான கான்பெட் நிா்வாக இயக்குநா் ஐயப்பன் புதிய அறிவிப்பை வெளியிட்டுள்ளாா். அதில், புதுச்சேரி முழுக்க தீபாவளிக்கு அனைத்து ரேஷன் அட்டைகளுக்கும் மளிகை, சா்க்கரை, எண்ணெய் இலவச விநியோகம் செய்யப்படவுள்ளன. அதற்காக குறுகிய கால மின் டெண்டா் விடப்படுகிறது. டெண்டா் எடுக்க விரும்புவோா் வரும் 3-ஆம் தேதி மாலைக்குள் விண்ணப்பிக்கலாம் என்று தெரிவித்துள்ளாா்.

இந்நிலையில் இலவச பொருள்களை ஒரு தொகுப்பு பையாக தர முடிவு எடுத்துள்ளனா். அதன்படி சா்க்கரை 2 கிலோ, சன்பிளவா் ஆயில் 2 கிலோ, கடலை பருப்பு ஒரு கிலோ, ரவா 500 கிராம், மைதா 500 கிராம் அடங்கியதாக அந்த தொகுப்பு இருக்கும் என கூறப்படுகிறது.