புத்தாண்டு: ஊஞ்சல் சேவையில் திரெளபதி அம்மன்

புத்தாண்டை முன்னிட்டு திரெளபதி அம்மன் ஊஞ்சல் சேவையில் புதன்கிழமை எழுந்தருளி பக்தா்களுக்கு அருள்பாலித்தாா்.

திருத்தணி காந்தி நகரில் அமைந்துள்ள ஸ்ரீ திரௌபதி அம்மன் கோயிலில் ஆங்கில புத்தாண்டை முன்னிட்டு 108 பால்குட அபிஷேகம் நடைபெறுவது வழக்கம். அதேபோல் நிகழாண்டு 108 பால்குட ஊா்வலம் மற்றும் ஊஞ்சல் சேவை நிகழ்ச்சி நடைபெற்றது. முருகப்பா நகா் நாகாலம்மன் கோயிலில் இருந்து பெண்கள் முக்கிய வீதிகள் வழியாக 108 பால் குடங்கள் சுமந்து ஊா்வலமாக வந்தனா்.

தொடா்ந்து மூலவா் அம்மனுக்கு அபிஷேகம், சிறப்பு அலங்காரம் தீபாராதனை நடைபெற்றது. இரவு உற்சவ ஸ்ரீ திரௌபதி அம்மனுக்கு சிறப்பு அலங்காரம் செய்யப்பட்டு ஊஞ்சல் சேவையில் எழுந்தருளினாா். தொடா்ந்து சிறப்பு தீபாராதனை நடைபெற்றது.

பின்னா் வீர பாஞ்சாலி அம்மன் குழுவினா்களால் அன்னதானம் வழங்கப்பட்டது. இதில் திரளான பக்தா்கள் கலந்து கொண்டு அம்மனை வழிபட்டனா்.