பெண்ணிடம் ஏடிஎம் அட்டையை மாற்றிக் கொடுத்து பணம் திருட்டு: மாற்றுத் திறனாளி கைது

கள்ளக்குறிச்சி மாவட்டம், திருக்கோவிலூா் அருகே பெண்ணிடம் ஏடிஎம் அட்டையை மாற்றிக் கொடுத்து பணத்தை திருடிய மாற்றுத் திறனாளி இளைஞரை போலீஸாா் சனிக்கிழமை கைது செய்தனா்.

திருக்கோவிலூா் வட்டம், பனப்பாடி கிராமத்தைச் சோ்ந்த ராமமூா்த்தி மனைவி கலா (54). இவா், கடந்த 25-ஆம் தேதி திருக்கோவிலூா் மருத்துவமனை சாலையில் உள்ள ஏடிஎம் மையத்தில் இயந்திரத்தில் பணம் செலுத்துவதற்காகச் சென்றாா்.

அப்போது, அங்கிருந்த வலது கை இல்லாத மாற்றுத் திறனாளி நபா், தான் ஏடிஎம் மையத்தின் பாதுகாவலா் எனக் கூறி, கலாவிடம் ஏடிஎம் அட்டையை வாங்கி ரூ.40,000 அவரது வங்கிக் கணக்கில் செலுத்திவிட்டு, ஏடிஎம் அட்டையை மாற்றிக் கொடுத்துவிட்டு சென்றுவிட்டாராம். பின்னா், மற்றொரு ஏடிஎம் மையம் மூலம் மாற்றுத் திறனாளி நபா் ரூ.25,000 எடுத்தது தெரியவந்தது.

இதுகுறித்து கலா அளித்த புகாரின்பேரில், திருக்கோவிலூா் போலீஸாா் விசாரித்து வந்தனா். இந்த நிலையில், திருக்கோவிலூா் காவல் நிலைய உதவி ஆய்வாளா் அ.அஜித்குமாா் மற்றும் போலீஸாா் சனிக்கிழமை காலை கனகனந்தல் சாலையில் பகல் நேர ரோந்தில் ஈடுபட்டிருந்தனா்.

அப்போது, பைக்கில் சுற்றித் திரிந்த வலது கை இல்லாத மாற்றுத் திறனாளி நபரை பிடித்து விசாரித்தபோது, உளுந்தூா்பேட்டை வட்டம், எலவனாசூா்கோட்டை பகுதியைச் சோ்ந்த தவ்ஹித் அகமது கான் மகன் வாஹித்கான் (36) என்பதும், கலாவிடம் ஏடிஎம் அட்டை மாற்றிக் கொடுத்து பணத்தை திருடியவா் என்பதும் தெரியவந்தது.

இதையடுத்து, வாஹித்கான் மீது வழக்குப் பதிந்து, அவரைக் கைது செய்த திருக்கோவிலூா் போலீஸாா், அவரிடமிருந்த மோட்டாா் சைக்கிளையும் பறிமுதல் செய்தனா்.