பெரம்பலூரில் ஓய்வூதியா்கள் தா்னா

சுருக்கப்பட்டுள்ள தொழிலாளா் சட்டங்களை ரத்து செய்ய வேண்டும் என்பது உள்ளிட்ட 9 அம்சக் கோரிக்கைகளை வலியுறுத்தி, தமிழ்நாடு அரசு அனைத்துத் துறை ஓய்வூசியா்கள் சங்கத்தினா் செவ்வாய்க்கிழமை தா்னா போராட்டத்தில் ஈடுபட்டனா்.

மாவட்ட ஆட்சியரகம் எதிரே நடைபெற்ற போராட்டத்துக்கு அச் சங்கத்தின் மாவட்ட துணைத் தலைவா் பி. நீலமேகம் தலைமை வகித்தாா். மாவட்ட துணைத் தலைவா்கள் செ. மகேஸ்வரன், கி. இளவரசன், இணைச் செயலா்கள் து. விஜயராமு, ரெ. பரமசிவம், மு. தமிழன்பன் ஆகியோா் முன்னிலை வகித்தனா். மாவட்டத் தலைவா் கி. ஆளவந்தாா் கோரிக்கைகளை விளக்கினாா்.

போராட்டத்தில் ஊதியக் குழுவின் பரிந்துரைகளிலிருந்து நீக்கி வைக்கும் நிதி மசோதா சட்டத்தையும், 4 தொகுப்பாக கருக்கப்பட்டுள்ள தொழிலாளா் சட்டங்களையும் ரத்து செய்ய வேண்டும். ஓய்வூதிய நிதி ஒழுங்காற்றுச் சட்டத்தை ரத்து செய்ய வேண்டும். ஊழியா்களிடம் பிடித்த தொகையை உடனடியாக மாநில அரசுகளுக்கு திருப்பி அளித்திட நிதி மேலாளா்களுக்கு உத்தரவிட வேண்டும். 1995 ஆம் ஆண்டு வருங்கால வைப்புநிதி ஓய்வூதியா்களுக்கு வரையறுக்கப்பட்டட ஓய்வூதியம் வழங்க வேண்டும். மத்திய அரசின் 8 ஆவது ஊதியக்குழு பயன்களை ஊழியா்களுக்கும், ஓய்வூதியா்களுக்கும் வழங்க வேண்டும். ஒவ்வொரு 5 ஆண்டுக்கும் ஊதிய, ஓய்வூதிய மாற்றத்தை உயா்த்தி வழங்கிட வேண்டும் என்பன உள்ளிட்ட 9 அம்ச கோரிக்கைகளை வலியுறுத்தி முழக்கமிட்டனா்.

இதில் சங்க நிா்வாகிகள் பி. மருதமுத்து, பி. ராமைய்யா, டி. தயாளன், து. தேவராஜ், பி. அங்குசாமி உள்ளிட்ட பலா் பங்கேற்றனா். மாவட்டச் செயலா் பி. சின்னசாமி வரவேற்றாா். மாவட்ட பொருளாளா் கி. ராஜேந்திரன் நன்றி கூறினாா்.