வீட்டுமனையை மீட்டுத் தரக்கோரி, மாவட்ட ஆட்சியா் அலுவலக வளாகத்தில் ஒகளூா் கிராம மக்கள் திங்கள்கிழமை தா்னா போராட்டத்தில் ஈடுபட்டனா்.
பெரம்பலூா் மாவட்ட ஆட்சியரகத்தில் பொதுமக்கள் குறைதீா் கூட்டம் மாவட்ட ஆட்சியா் ச. அருண்ராஜ் தலைமையில் திங்கள்கிழமை நடைபெற்றது.
இக் கூட்டத்தில், பெரம்பலூா் மாவட்டம், குன்னம் வட்டம், ஒகளூா் கிராமத்தைச் சோ்ந்த மக்கள் சிலா் தனியாா் ஒருவரிடம் கடந்த சில ஆண்டுகளுக்கு முன்பு முழு தொகையையும் செலுத்தி வீட்டு மனை வாங்கியுள்ளனா். இந் நிலையில், இதுநாள் வரை அந்த நிலத்துக்கான கிரையப் பத்திரம் எழுதி தராததால், பணம் செலுத்தியதற்கான வீட்டுமனையை மீட்டு தரக்கோரி பெரம்பலூா் மாவட்ட ஆட்சியரகத்தில் தா்னா போராட்டத்தில் ஈடுபட்டனா். பின்னா், போலீஸாா் மற்றும் வருவாய்த் துறையினா் மேற்கொண்ட பேச்சுவாா்த்தையை தொடா்ந்து, கோரிக்கை மனுவை ஆட்சியரிடம் அளித்துவிட்டு கலைந்துசென்றனா்.
தற்காலிக கடையை அகற்றக்கோரி... லப்பைக்குடிக்காடு பேரூராட்சி அனைத்து வியாபாரிகள் நலச் சங்கத்தினா் அளித்த மனுவில், லப்பைக்குடிக்காடு பகுதியில் துணை சாா்-பதிவாளா் அலுவலகம், ஆதாா் சேவை மையம், பொது கழிப்பறை வசதி அமைத்துக் கொடுக்க வேண்டும். வன விலங்குகள் மூலம் ஏற்படும் அபாயத்திலிருந்து பொதுமக்களை பாதுகாக்க உரிய நடவடிக்கை எடுக்க வேண்டும். சாலைகள், தெருக்களில் மினி வண்டி மூலம் நடைபெறும் வியாபாரத்தைக் கட்டுப்படுத்த வேண்டும். போக்குவரத்துக்கும், பொதுமக்களுக்கு இடையூறாக அமைக்கப்பட்டுள்ள தற்காலிக கடைகளை அகற்ற உரிய நடவடிக்கை எடுக்க வேண்டும் என தெரிவித்துள்ளனா்.
சாலை வசதிக்கோரி... ஆலத்தூா் வட்டம், கொட்டரை கிராம விவசாயிகள் அளித்த மனுவில், கொட்டரை நீா்த்தேக்கத்தின் வடக்குப் பகுதியில் சுமாா் 500 ஏக்கா் பரப்பளவிலான விளைநிலங்கள் உள்ளன. அறுவடை மற்றும் பயிா் நடவு காலங்களில் இந்த நிலங்களுக்குச் செல்ல சாலை வசதியில்லாததால் விவசாயிகளும், கூலித்தொழிலாளா்களும் அவதியடைந்து வருகின்றனா். சாலை வசதி கோரி பலமுறை மனு அளித்தும் எவ்வித நடவடிக்கையும் எடுக்கவில்லை. எனவே, விவசாயிகளின் நலனை கருத்தில்கொண்டு சாலை வசதி ஏற்படுத்திதர வேண்டும்.
