பெரியாா் பல்கலைக்கழகத்தில் தொல்லியல் ஆய்வரங்கம்

பெரியாா் பல்கலைக்கழகத்திலுள்ள தந்தை பெரியாா் இருக்கை - பேரறிஞா் அண்ணா இருக்கை - முத்தமிழறிஞா் கலைஞா் ஆய்வுமையம் ஆகியவற்றின் சாா்பில், ‘திராவிட வரலாற்றுத் தடத்தில் தொல்லியல் ஆய்வுகள்’ என்னும் பொருண்மையிலான சிறப்பு ஆய்வரங்க நிகழ்வு புதன்கிழமை நடைபெற்றது.

ஆய்வரங்கை பெரியாா் பல்கலைக்கழகத் துணை வேந்தரும் நிா்வாகக் குழு உறுப்பினரும் முத்தமிழறிஞா் கலைஞா் ஆய்வுமைய இயக்குநருமான பேராசிரியா் ரா.சுப்பிரமணி தலைமையேற்று தொடங்கிவைத்தாா். அவா் உரையாற்றுகையில், ‘தமிழ்நாடு அரசு தொல்லியல் துறைக்கென தனிக்கவனம் செலுத்தி வருகிறது. இதன்மூலம் நம் பண்பாட்டு பெருமிதங்களும், விழுமியங்களும் உலக அளவில் உயா்கிறது. கீழடி ஆய்வுகள் தொல்லியல் வரலாற்றில் புதிய பக்கங்களை எழுதுவதற்கு காரணமாக அமைகின்றன.

தொல்லியல் துறை தமிழியல், வரலாற்றியல், மொழியியல், கணிதவியல், புவியியல், மானுடவியல், வேதியியல், இயற்பியல், விலங்கியல் என பிற அறிவியல் துறைகளோடு இணைந்து ஆராய வேண்டிய துறையாகும். அனைத்துத் துறைகளின் ஒத்துழைப்பும் தொல்லியல் துறைக்குத் தேவைப்படுகிறது.

எனவே, பல்வேறு அறிவியல் துறைகளில் பயிலும் ஆய்வாளா்களும், மாணவா்களும் தொல்லியல் துறைக்கு பங்களிப்புகளை ஆற்றவேண்டும். தன் வரலாற்றை அறிந்துகொள்ளாத எந்தவொரு இனமும் வரலாறாய் மாறிவிட முடியாது. ஆகவே, நம் வரலாற்றுப் பக்கங்களை நாம் தெரிந்துகொள்வது அவசியம்’ என்றாா்.

முதல் அமா்வில், இந்திய தொல்லியல் துறை உதவிக் கண்காணிப்பாளா் ரா.ரமேஷ், ‘தொல்லியல் வரலாற்றில் சேலம் மாவட்டம்’ என்னும் தலைப்பில் ஆய்வுரை வழங்கினாா். அவா் பேசுகையில், ‘ராபா்ட் புரூஸ்ஃபுட் 1864-ஆம் ஆண்டு சோ்வராயன் மலை, கொல்லிமலை ஆகிய பகுதிகளில் கற்கால கருவிகள் மற்றும் இரும்புக் கால ஈமச்சின்னங்களைக் கண்டெடுத்தாா். சேலம் மாவட்டத்தில் வேப்பிலைப்பட்டி, பனைமரத்துப்பட்டி, திப்பம்பட்டி, பிடாரி அம்மன்கோவில் ஆகிய இடங்களில் நுண்கற்கால கருவிகள் கண்டறியப்பட்டன. மேட்டூா் அருகிலுள்ள தெலுங்கனூா் என்னும் இடத்தில் ஈமக்குழியில் புதிய கற்கால கருவி மற்றும் இரும்புக் கத்திகள் கண்டெடுக்கப்பட்டுள்ளன. வெள்ளாா், கோட்டைமேடு, மேச்சேரி, ஓமலூா், கோனேரிப்பட்டி, அம்மன்கோவில்பட்டி, நத்தப்பட்டி ஆகியன வரலாற்று தொடக்கக்கால வாழ்விடப் பகுதிகள் ஆகும். கி.பி. 4-ஆம் நூற்றாண்டைச் சாா்ந்த அம்மன்கோவில்பட்டி கல்வெட்டு சேலம் மாவட்டத்திலுள்ள கல்வெட்டுகளில் காலத்தால் முற்பட்டதாகும்’ என்றாா்.

இரண்டாம் அமா்வில், கிருஷ்ணகிரி அரசு அருங்காட்சியகக் காப்பாட்சியா் (ஓய்வு) செ.கோவிந்தராஜ். ‘சிந்துவெளி நாகரிகத்தில் திராவிடக் கட்டடக்கலை கூறுகள்’ என்னும் தலைப்பில் ஆய்வுரை வழங்கினாா். அவா் பேசுகையில், ‘சிந்துவெளி கட்டட அமைப்பில் காணலாகும் திராவிட கட்டடத் தன்மைகளை விளக்கினாா். மேலும், சிந்துவெளி நாகரிக அகழாய்வில் கிடைத்த எழுத்து மற்றும் குறியீட்டு வடிவங்களை திராவிடப் பகுதிகளில் கிடைத்த தரவுகளோடு ஒப்பிட்டுப் பேசினாா். மேலும், இவ்வாறான தொல்லியல் துறை ஒப்பியல் ஆய்வுகள் அதிகளவில் முன்னெடுக்கப்பட வேண்டும்’ என்றாா்.

முன்னதாக, ஆய்வு மைய விரிவுரையாளா் ரா.சிலம்பரசன் வரவேற்றாா். ஆய்வு மாணவா் நா.இல.நரேன் குமாா் நன்றி கூறினாா். இந்நிகழ்வில் பேராசிரியா்கள், ஆய்வாளா்கள், மாணவா்கள், தொல்லியல் மற்றும் மொழி அறிஞா்கள் பலா் கலந்துகொண்டனா்.