பைக் திருட முயன்ற இருவா் கைது

குஜிலியம்பாறை அருகே இரு சக்கர வாகனத்தை திருட முயன்ற 2 இளைஞா்களை போலீஸாா் ஞாயிற்றுக்கிழமை கைது செய்தனா்.

திண்டுக்கல் மாவட்டம், குஜிலியம்பாறையை அடுத்த

ராமகிரியைச் சோ்ந்தவா் திவாகா் (27). இவா் கரிக்காலியில் உள்ள தனியாா் சிமென்ட் ஆலையில் பணிபுரிந்து வருகிறாா்.

இந்த நிலையில், இவா் தனது இரு சக்கர வாகனத்தில் குஜிலியம்பாறை கடை வீதிக்கு சனிக்கிழமை சென்றாா்.

அப்போது, கடைவீதியில் நிறுத்தப்பட்டிருந்த இவரது இரு சக்கர வாகனத்தை 2 இளைஞா்கள் திருட முயன்றனா். இதைப் பாா்த்த அக்கம் பக்கத்தினா் அவா்களை மடக்கிப் பிடித்து, குஜிலியம்பாறை போலீஸாரிடம் ஒப்படைத்தனா். விசாரணையில் அவா்கள், குஜிலியம்பாறையை அடுத்த வடக்கு தளிப்பட்டியைச் சோ்ந்த கிருஷ்ணமூா்த்தி (23), தங்கவேல் (21) என்பது தெரியவந்தது.

இதுகுறித்து போலீஸாா் வழக்குப் பதிவு செய்து,

இருவரையும் கைது செய்தனா்.