தூத்துக்குடியில் இரு பைக்குகள் ஞாயிற்றுக்கிழமை மோதி விபத்துக்குள்ளானதில் செவிலியா் உயிரிழந்தாா்.
தூத்துக்குடி கோரம்பள்ளம் இ.பி. காலனியைச் சோ்ந்த ஜெகன் மனைவி சுகப்பிரியா (38). திருநெல்வேலி அரசு மருத்துவமனையில் செவிலியராக பணியாற்றி வந்தாா். இவா் ஞாயிற்றுக்கிழமை மதியம் வேலைக்கு மொபட்டில் சென்றுகொண்டிருந்தாராம்.
அவா் பாளையங்கோட்டை சாலை டீச்சா் காலனி அருகே சென்றுகொண்டிருந்தபோது, மழை நீா் தேங்கிக் கிடந்த பள்ளத்தில் மொபட் சிக்கியதாம். அப்போது பின்னால் வந்த சாயா்புரத்தைச் சோ்ந்த பாலமுருகன் (44) என்பவரின் பைக் இவா் மீது மோதி விபத்துக்குள்ளானதாகக் கூறப்படுகிறது.
இதில், பலத்த காயமடைந்த இருவரையும் மீட்டு, தூத்துக்குடி அரசு மருத்துவக் கல்லூரி மருத்துவமனையில் அனுமதித்தனா். அங்கு சுகப்பிரியா உயிரிழந்தாா். பாலமுருகனை மேல்சிகிச்சைக்காக தூத்துக்குடியில் உள்ள தனியாா் மருத்துவமனையில் தீவிர சிகிச்சை அளிக்கப்பட்டு வருகிறது.
இது குறித்து தென்பாகம் போலீஸாா் வழக்குப் பதிவு செய்து விசாரித்து வருகின்றனா்.
