பொங்கல் பண்டிகை: விழுப்புரத்தில் பொருள்கள் வாங்கக் குவிந்த மக்கள்

விழுப்புரம்: தமிழா் திருநாளாம் பொங்கல் பண்டிகையை உற்சாமாகக் கொண்டாடி மகிழ்வதற்காக, தங்கள் வீடுகளுக்குத் தேவையான பொருள்களை வாங்க விழுப்புரம் கடை வீதிகளில் பொதுமக்கள் திங்கள்கிழமை அதிகளவில் குவிந்தனா். இதன் காரணமாக, பல்வேறு சாலைகளும் போக்குவரத்து நெரிசல் மிகுந்து காணப்பட்டது.

விழுப்புரம் நகரிலும், மாவட்டத்தின் பல்வேறு பகுதிகளிலும் பொங்கல் திருநாள் பொருள்கள் விற்பனை சனிக்கிழமை முதலே களைகட்டத் தொடங்கியது.

விழுப்புரத்தில் கோலியனூா் சாலை, வளவனூா் சாலை, ரயில் நிலையச் சாலை போன்ற நகரின் பல்வேறு பகுதிகளில் பொங்கலிடுவதற்கான புதுப்பானைகள் விற்பனைக்காக வைக்கப்பட்டிருந்தன. ரூ.50 முதல் ரூ.120 வரையிலான விலைகளில் சிறிய அளவிலான பானைகளும், ரூ.150 முதல் ரூ.300 வரையிலான விலைகளில் பெரிய அளவிலான பானைகளும் விற்பனைக்கு வைக்கப்பட்டிருந்தன.

மாவட்டத்தில் வேலியம்பாக்கம், பிடாகம், அத்தியூா் திருக்கை, குச்சிப்பாளையம், நத்தமேடு உள்ளிட்ட பகுதிகளில் விளைவிக்கப்பட்ட கரும்புகள் விழுப்புரம் நகரின் பல்வேறு இடங்களில் வியாபாரிகள் விற்பனைக்கு வைத்திருந்தனா். நிகழாண்டில் 2 கரும்பு அல்லது 3 கரும்பு கொண்ட ஜோடி ரூ.100 என்ற விலையிலும், 15 முதல் 20 எண்ணிக்கை கொண்ட கரும்புக் கட்டு ரூ.700 முதல் ரூ.850 வரையிலான விலைகளிலும் விற்பனையாகின.

மஞ்சள் கொத்து ரு.30 முதல் ரூ.40 வரையிலும், தேங்காய் ரூ.30 முதல் ரூ.40 வரையிலும், வாழைப்பழம் சீப்பு ரூ.80 முதல் ரூ.100 வரையிலும், வாழைத்தாா் ரூ.600 முதல் ரூ.1,200 வரையிலும் விற்பனையாகின.

இதுபோன்று, மாடுகளுக்கு கட்டப்படும் மூக்கணாங்கயிறு ரூ.10 முதல் ரூ.60 வரையிலும், மணிகள் கொண்ட அலங்காரக் கயிறு ரூ.150 முதல் ரூ.600 வரையிலும், மாடுகளின் கொம்புகளுக்குத் தீட்டப்படும் வா்ணம் டப்பா ரூ.25 முதல் ரூ.30 வரையிலும் விற்பனை செய்யப்பட்டன.

ஃபென்ஜால் புயலால் ஏற்பட்ட பெருவெள்ளத்தில் மாடுகள் அதிகளவில் உயிரிழந்த நிலையில், மூக்கணாங்கயிறு உள்ளிட்ட பொருள்களின் விற்பனை எதிா்பாா்த்த அளவில் இல்லை என்று வியாபாரிகள் தெரிவித்தனா்.

பூக்கள் வரத்து குறைவு: இதுபோல, விழுப்புரம் பூ சந்தைக்கு பூக்களின் வரத்து குறைந்து காணப்பட்டது. இதன் காரணமாக, பூக்களின் விலை வழக்கத்தைக் காட்டிலும் கூடுதலான விலையில் விற்பனை செய்யப்பட்டது.

பொங்கல் பொருள்களை வாங்க விழுப்புரம் நகரில் மகாத்மா காந்தி சாலை, காய்கனி சந்தை வீதி, பாகா்ஷா வீதிகளில் பொதுமக்கள் கூட்டம் திங்கள்கிழமை அலைமோதியது. காய்கனி சந்தைக்கு பொருள்கள் வாங்கச் சென்றவா்களாலும், வாங்கிவிட்டு வெளியே வந்தவா்களாலும் விழுப்புரம் - புதுச்சேரி சாலை, கே.கே. சாலை, பாகா்ஷா வீதி, திரு.வி.க. வீதி, காமராஜா் வீதி உள்ளிட்ட முக்கிய சாலைகளில் கடும் போக்குவரத்து நெரிசல் ஏற்பட்டது.

பண்டித ஜவாஹா்லால் நேரு சாலையில் தொடங்கி விழுப்புரம் ரயில் நிலையம் வரையிலான பகுதியில் (கிழக்கு புதுச்சேரி சாலை) போக்குவரத்து நெரிசல் அதிகரித்து காணப்பட்டது.

போக்குவரத்து போலீஸாா் கூடுதலாக பணியில் ஈடுபடுத்தப்பட்டு போக்குவரத்தை சரிசெய்யும் பணியில் ஈடுபட்டனா். மேலும், புதிய பேருந்து நிலையம், வீரவாழியம்மன் கோயில் உள்ளிட்ட பகுதிகளில் கண்காணிப்பு கோபுரங்கள் அமைத்து போலீஸாா் பாதுகாப்பு பணியில் ஈடுபட்டனா்.