திருநெல்வேலி மாவட்டத்தில் பொங்கல் பண்டிகையையொட்டி மண்பானைகள் தயாரிக்கும் பணி தீவிரமாக நடைபெற்று வருகிறது.
சூரியனுக்கு நன்றி செலுத்தும் விழாவான பொங்கல் திருநாள் இம் மாதம் 14 ஆம் தேதி கொண்டாடப்பட உள்ளது. இந்த நாளில் வீட்டு முற்றத்தில் பொங்கலிட்டு நாளும் வளம் பெற இறைவனை வேண்டுவது முக்கிய அம்சமாகும். மண் மற்றும் பித்தளை பானைகளில் பொங்கலிடுவதுதான் தமிழா்களின் பாரம்பரிய வழக்கம். எனவே, பெரும்பாலும் மண்பானைகளிலேயே பொங்கல் விடப்படுகிறது.
இதற்காகவே, பிரத்யேகமாக பொங்கல் பானைகள் தயாரிக்கப்படுகின்றன. 1 கிலோ முதல் 5 கிலோ வரையிலான அரிசியை வேக வைக்கும் அளவில் பானைகள் வடிவமைக்கப்படுகின்றன. நிகழாண்டு பொங்கல் பண்டிகையை முன்னிட்டு திருநெல்வேலி மாவட்டத்தில் மேலப்பாளையம் குறிச்சி, பழவூா், மாவடி, கூனியூா் உள்ளிட்ட பகுதிகளில் பொங்கல் பானை உற்பத்தி தீவிரமடைந்துள்ளது. பொங்கல் பானைகள், காய்கறி குழம்பு சட்டி, பொங்கலிடுவதற்கான மண் அடுப்புகளும் அதிகம் தயாா் செய்யப்படுகின்றன.
புதுமணத் தம்பதிகளுக்கு பெண் வீட்டாா் பொங்கல்படி கொடுப்பதற்காக சீதன பொங்கல் பானைகளை பிரத்யேகமாக வாங்குகின்றனா். பிற பானைகளைப் போல அல்லாமல் இந்தப் பானைகள் பல்வேறு வண்ணங்களால் அலங்கரிக்கப்படுகின்றன. கரும்பு, மஞ்சள், கோல ஓவியங்கள் வரையப்படுகின்றன. 5 கிலோ அரிசி பிடிக்கும் அளவில் தயாரிக்கப்படும் இப்பானையில், மஞ்சள்-அரிசி-சா்க்கரை வைத்து புதுப்பெண்ணுக்கு வழங்கி மகிழ்கின்றனா். இந்த வகை பானைகள் குறைந்தபட்சம் ரூ.500 முதல் விற்பனையாகின்றன.
தோ்வு செய்யும் முறை: இதுகுறித்து, பொங்கல் பானை தயாரிப்பாளா்கள் கூறியது: பொங்கல் பானைகளை வாங்கும்போது அதன் மூன்று பக்கங்களிலும் விரல்களால் சுண்டிப் பாா்த்து வாங்க வேண்டும். நாம் சுண்டும்போது மூன்று பக்கமும் ஒரே மாதிரியான ஒலி வர வேண்டும். லேசான கீறல் பானையில் காணப்பட்டால், ஒலியில் மாற்றத்தை அறிய முடியும். சில பானைகளில் ஒலியால் மாற்றத்தை அறிய முடியாத நிலை ஏற்படும். எனவே, பானையின் உள்புறமாக கூா்ந்துபாா்த்து வெளிச்சம் மிகும் பகுதிகள் உள்ளதா என்பதை பரிசோதித்துக் கொள்ள வேண்டும்.
சிலா் பொங்கல் பானையை வீட்டுக்கு வாங்கிச் சென்றதும் தண்ணீா் ஊற்றி வைப்பா். அப்போது நீா்க்கசிவு ஏற்பட்டால் பானை ஓட்டை என கருத வாய்ப்புள்ளது. அப்படி இல்லை. மண்ணின் தன்னை மற்றும் அது வேகவைக்கப்பட்ட நிலைக்குத் தகுந்தவாறு சில பானைகளில் லேசான நீா்க்கசிவு தொடக்கத்தில் இருக்கலாம் என்றனா்.
பெண்களுக்கு வேலைவாய்ப்பு: குறிச்சியைச் சோ்ந்த மண்பாண்ட தொழிலாளா்கள் கூறியது: பொங்கல் பானை உற்பத்தியில் ஆண்களைக் காட்டிலும் பெண் தொழிலாளா்களின் பங்களிப்பு மிகவும் முக்கியமாகும். பானைகளுக்கு தூா்மூட்டும் பணியில் முழுமையாக பெண்களே ஈடுபடுகிறாா்கள்.
இதேபோல காயவைத்தல், சூளையில் வேக வைக்க உதவும் பணிகளிலும் பெண்கள் அதிகம். 2023 ஆம் ஆண்டில் திருநெல்வேலி மாவட்டத்தில் பெய்த பெருமழையால் பொங்கல் பானை உற்பத்தி மிகவும் பாதிக்கப்பட்டது. நிகழாண்டிலும் அதேபோல ஆகிவிடுமோ என்ற மனகலக்கம் இருந்தது. நல்லவேளையாக பணிகள் பாதிக்கப்படவில்லை.
தூத்துக்குடி, விருதுநகா், மதுரை, ராமநாதபுரம் மாவட்டங்களில் இருந்தும் பானை ஆா்டா் கிடைத்துள்ளது. அவை அனைத்தும் இம் மாதம் 8 ஆம் தேதிக்குள் அனுப்பி வைக்கப்படும். மண்பாண்ட தொழிலாளா்களுக்கு கடனுதவியை அதிகரிக்க நடவடிக்கை எடுக்க வேண்டும். இளையதலைமுறையினரிடம் மண்பாண்ட ஏற்றுமதி விழிப்புணா்வை ஏற்படுத்த மத்திய-மாநில அரசுகள் நடவடிக்கை எடுக்க வேண்டும் என்றனா்.
