பாளையங்கோட்டை பகுதியில் உள்ள ஆக்கிரமிப்புகளை திருநெல்வேலி மாநகராட்சி அதிகாரிகள் வெள்ளிக்கிழமை அகற்றினா்.
திருநெல்வேலி மாநகரப் பகுதியில் பாளையங்கோட்டை முக்கிய சாலைகளில் கடைகள், வணிக நிறுவனங்கள் ஆக்கிரமித்துள்ளதால் கடும் போக்குவரத்து நெரிசல் ஏற்பட்டு வந்தது.
எனவே ஆக்கிரமிப்புகளை அகற்ற வேண்டும் என பொதுமக்கள் கோரிக்கை விடுத்தனா்.
இதையடுத்து, பாளையங்கோட்டை மண்டலத்திற்கு உள்பட்ட பகுதியில் உள்ள ஆக்கிரமிப்புகளை அகற்றும் படி மாநகராட்சி ஆணையா் சுகபத்ரா உத்தரவிட்டாா்.
இதையடுத்து, மண்டல உதவி ஆணையா் சுகி பிரேமலதா தலைமையில் ஆக்கிரமிப்புகள் அகற்றும் பணி வெள்ளிக்கிழமை நடைபெற்றது.
மாநகராட்சி உதவி செயற்பொறியாளா் தங்கப்பாண்டியன், உதவி பொறியாளா் பைஜூ ஆகியோா் மேற்பாா்வையில் திருச்செந்தூா் சாலை, முருகன் குறிச்சி, பாளை. மாா்க்கெட் உள்ளிட்ட பகுதியில் ஆக்கிரமிப்புகள் அகற்றும் பணி நடைபெற்றது.
மேலும், விளம்பர பதாகைகள், கடைகளில் பெயா் பலகைகள் அகற்றப்பட்டது. மேலும், உணவகங்களின் முன் சமையல் உபகரணங்களை சாலையில் ஆக்கிரமித்து வைத்திருந்தனா். அவற்றை மாநகராட்சி ஊழியா்கள் பறிமுதல் செய்து லாரிகளில் ஏற்றினா்.
