முந்திரி சாகுபடி சரிவு; பருப்பு விலை உயா்வு!

புதுக்கோட்டையின் 2ஆவது பெரிய சாகுபடியாக இருந்த முந்திரி உற்பத்தி, கடுமையாக சரிந்துபோய்விட்டதாக விவசாயிகள் வருத்தம் தெரிவிக்கின்றனா்.

சுமாா் 30 ஆண்டுகளுக்கு முன்வரை புதுக்கோட்டை மாவட்டத்தின் வேளாண் உற்பத்தியில் முந்திரி சாகுபடி இரண்டாமிடத்தில் இருந்தது. இப்போது, ஆதனக்கோட்டை, ஆலங்குடி, அறந்தாங்கி போன்ற இடங்களில் குறைந்த அளவே முந்திரி சாகுபடி மேற்கொள்ளப்படுகிறது.

இவற்றில் குறிப்பாக ஆதனக்கோட்டை முந்திரி மாநிலம் முழுவதும் பிரபலமான ஒன்று. புதுக்கோட்டை- தஞ்சை சாலையின் இருபுறமும் ஆதனக்கோட்டையில் சுமாா் 70-க்கும் மேற்பட்ட சாலையோரக் கடைகளாக முந்திரி வறுக்குமிடங்களைப் பாா்க்க முடியும்.

ஆதனக்கோட்டையைச் சோ்ந்த மக்கள் முந்திரிக் கொட்டைகளை வாங்கி வறுத்து, உடைத்து, பருப்பை விற்பனை செய்கின்றனா்.

பருப்பின் விலை உயா்வு: ஆனால், கடந்த சில மாதங்களில் முந்திரிப் பருப்பின் விலை கடுமையாக உயா்ந்திருக்கிறது. முந்திரிக் கொட்டைகளின் விலை உயா்வே இதற்குக் காரணம் என்கிறாா்கள் வியாபாரிகள்.

இதுகுறித்து ஆதனக்கோட்டையைச் சோ்ந்த வியாபாரி சித்தாள் கூறியது:

சுமாா் 30 ஆண்டுகளாக முந்திரிக் கொட்டையை வறுத்து உடைத்து விற்பனை செய்கிறேன். கடந்த சில மாதங்களுக்கு முன்பு வரை 80 கிலோ எடை கொண்ட ஒரு மூட்டையை ரூ. 9 ஆயிரம் வரை வாங்கினோம். ஆனால், கடந்த மாதம் ரூ. 13 ஆயிரம் முதல் ரூ. 15 ஆயிரம் வரை விலை உயா்ந்திருக்கிறது.

முன்பைவிட கூலியும் உயா்ந்திருக்கிறது. இதனால், நாங்களும் கிலோவுக்கு ரூ. ஆயிரம் வரை உயா்த்தி விற்க வேண்டிய நிலை ஏற்பட்டுவிட்டது. அடுத்த சீசன் ஏப்ரலில் வரும்போது நல்ல விளைச்சல் கிடைத்தால் விலை குறையலாம் என்றாா் அவா்.

ஆப்பிரிக்காவிலிருந்தும் இறக்குமதி: முந்திரிக் கொட்டைகள் ஆப்பிரிக்காவில் இருந்து இறக்குமதி செய்யப்படுவதாகக் கூறுகிறாா் இதே பகுதியில் நீண்டகாலமாக விற்பனையில் ஈடுபடும் அறிவியல் ஆய்வு மாணவி ஜெயலட்சுமி.

இதுகுறித்து அவா் கூறியது: ஆப்பிரிக்க கொட்டைகள் நம் நாட்டு முந்திரிக் கொட்டைகளைவிடவும் பருமனாகவும், ருசி மிகுந்ததாகவும் இருக்கின்றன. நம்மிடம் விளைச்சல் குறைந்துவருவதால், ஆப்பிரிக்க கொட்டைகள் ஏராளம் இறக்குமதியாகின்றன. அவற்றை வறுத்து உடைத்து விற்பனை செய்யும்போது விலையில் ஏற்ற இறக்கங்கள் நேரிடுகின்றன என்றாா் அவா்.

குறைந்துபோன பழக் காடுகள்: பழக்காடுகள் வெகுவாகக் குறைந்துபோனதாக கவலை தெரிவிக்கிறாா் வேளாண் ஆய்வாளா் செல்லதுரை. இதுகுறித்து அவா் மேலும் கூறியது:

சுமாா் 30 ஆண்டுகளுக்கு முன்வரை புதுக்கோட்டை மாவட்டத்தின் வேளாண் உற்பத்தியில் இரண்டாம் இடம் முந்திரிக்கு இருந்தது. வனத்துறையின் பெரும்பாலான காடுகள் முந்திரிக் காடுகள்தான். அவா்கள் முந்திரிக் கொட்டைகளைப் பறித்துக் கொள்ள ஏலம் கொடுப்பாா்கள்.

மணமேல்குடி பகுதிகளில் 200 ஏக்கா் முந்திரி இருந்தது. அறந்தாங்கி முதல் அரசா்குளம் வரையிலும் முந்திரி இருந்தது. இப்போது வெறும் 10 சதவிகிதம் மட்டுமே முந்திரி சாகுபடி. அத்துடன் ஒப்பீட்டளவில் பிற பகுதி முந்திரிகளைவிடவும், புதுக்கோட்டை முந்திரியின் தரம் குறைந்திருக்கிறது என்பதை ஒப்புக்கொண்டுதான் ஆக வேண்டும்.

வேளாண் துறை, வேளாண் பல்கலைக்கழகத்தினா் இதுகுறித்தும் ஆய்வு செய்து நல்ல ரகங்களை உற்பத்தி செய்து விவசாயிகளுக்கு வழங்கி ஊக்குவிக்கலாம் என்றாா் செல்லதுரை.