கடலூரில் போதை மாத்திரை விற்ற சம்பவத்தில் தொடா்புடையதாக பெண் உள்ளிட்ட 4 பேரை போலீஸாா் செவ்வாய்க்கிழமை கைது செய்தனா்.
கடலூரில் போதைப் பொருள் தடுப்பு நடவடிக்கையாக கடந்த ஜன.31-ஆம் தேதி திருப்பாதிரிபுலியூா் பேருந்து நிலையம் அருகே போலீஸாா் கண்காணிப்புப் பணியில் ஈடுபட்டிருந்தனா். அப்போது, சந்தேகத்தின் பேரில், மூவரை பிடித்து சோதனை நடத்தியதில், அவா்களிடம் மாத்திரைகள் மற்றும் ஊசிகள் இருந்தது தெரிய வந்தது.
விசாரணையில், அவா்கள் ஈரோட்டைச் சோ்ந்தவா் மூலம் மாத்திரைகளை வாங்கி ஊசிகள் மூலம் உடலில் செலுத்தி போதையில் இருந்து வந்தது தெரியவந்தது. இதையடுத்து, அவா்களிடமிருந்து 139 போதை மாத்திரைகள் மற்றும் 3 ஊசிகளை போலீஸாா் பறிமுதல் செய்தனா். இதுதொடா்பாக, கடலூா் மதுவிலக்கு அமல் குற்றப் பிரிவு போலீஸாா் வழக்குப் பதிந்து சபரிநாதன் (20), லட்சுமிபதி (20), சதீஷ் (20) ஆகியோரை கைது செய்து சிறையில் அடைத்தனா்.
இதனிடையே, இந்த வழக்கில் தொடா்புடைய அனைவரையும் கைது செய்யுமாறு மாவட்ட எஸ்.பி.ஜெயக்குமாா் உத்தரவிட்டதையடுத்து, மதுவிலக்கு உதவி ஆய்வாளா் தவசெல்வன் தலைமையிலான தனிப்படையினா் ஈரோட்டைச் சோ்ந்த கண்ணன் (39), சல்மான்கான் (29), வினோத்குமாா் (30), கலைவாணி (42) ஆகியோரை செவ்வாய்க்கிழமை கைது செய்தனா். அவா்களிடமிருந்து 2,500 வலி நிவாரண மாத்திரைகள், ரூ.50,000, ஒரு மடிக்கணினி, 3 கைப்பேசி, பைக் ஆகியவற்றை பறிமுதல் செய்தனா்.
