போதைப் பொருள் தடுப்பு நடவடிக்கையைத் தீவிரப்படுத்த வேண்டும்: கேவி.தங்கபாலு

போதைப் பொருள் தடுப்பு நடவடிக்கையை தமிழக அரசு மேலும் தீவிரப்படுத்த வேண்டும் என காங்கிரஸ் முன்னாள் தலைவா் கே.வி.தங்கபாலு தெரிவித்தாா்.

திண்டுக்கல்லில் காங்கிரஸ் நிா்வாக இல்ல நிகழ்ச்சியில் பங்கேற்பதற்காக வியாழக்கிழமை வந்த கேவி.தங்கபாலு பின்னா் செய்தியாளா்களிடம் கூறியதாவது:

அண்ணா பல்கலைக்கழக மாணவி பாலியல் வன்முறை தொடா்பாக, தமிழக காவல் துறை ஒருவரைக் கைது செய்திருக்கிறது. இதுதொடா்பாக தீவிரமாக விசாரித்து கடுமையான நடவடிக்கை எடுக்க வேண்டும். போதைப் பொருள் கலாசாரம் தமிழகம் மட்டுமன்றி, நாடு முழுவதும் அதிகரித்து வருகிறது. தமிழகத்தில் போதைப் பொருள் தடுப்பு நடவடிக்கைகளை மேலும் தீவிரப்படுத்த வேண்டும். அரசியலைக் கடந்து சமுதாய நலன் கருதி போதைப் பொருளுக்கு எதிராக அனைவரும் ஒன்றிணைய வேண்டும்.

கடந்த 18 மாதங்களுக்கு மேலாக மணிப்பூரில் கலவரம் நடைபெறுகிறது. தற்போது அந்த மாநிலத்தின் முதல்வா் மன்னிப்பு கோரியுள்ளாா். ஆனாலும், அங்கு செல்ல மறுக்கும் பிரதமா் மோடி வருத்தம் கூட தெரிவிக்கவில்லை. அசாம் உள்ளிட்ட 7 மாநிலங்களில் மிக அமைதியான வாழ்க்கை முறை இருந்தது. தற்போது மக்கள் பயத்தில் வாழ்ந்து கொண்டிருக்கின்றனா்.

உச்சநீதிமன்றம் அறிவுறுத்தியும்கூட விவசாயிகளின் கோரிக்கைகளுக்குத் தீா்வு காணவும், அவா்களின் போராட்டத்தை முடிவுக்குக் கொண்டு வரவும் மத்திய அரசு முயற்சி மேற்கொள்ளவில்லை. பிரமதா் மோடி, உள் துறை அமைச்சா் அமித் ஷா, பாஜக தலைவா் கே.அண்ணாமலை ஆகியோா் ஆா்எஸ்எஸ் கொள்கைகளைக் கடைபிடிப்பவா்கள். மக்களைப் பற்றி கவலைப்படமாட்டாா்கள் என்றாா் அவா்.