அமெரிக்க அதிபர் பதவியேற்பு விழா: வாஷிங்டன் சென்றடைந்தார் டிரம்ப்!
‘பஞ்சாப்-ஹரியாணா எல்லையில் கடந்த ஆண்டு பிப்ரவரி 13-ஆம் தேதியிலிருந்து போராடி வரும் விவசாயிகளுடன் வரும் பிப்ரவரி 14-ம் தேதி சண்டிகரில் மத்திய அரசு பேச்சுவாா்த்தை நடத்தும்’ என்று மத்திய வேளாண் அமைச்சக கூடுதல் செயலா் பிரியா ரஞ்சன் தெரிவித்தாா்.
மேலும், தொடா் உண்ணாவிரதப் போராட்டத்தில் ஈடுபட்டுள்ள ஜக்ஜீத் சிங் தல்லேவால் உடல்நிலை குறித்து விசாரிக்க சனிக்கிழமை கனெளரி பகுதிக்கு வந்த வேளாண் அமைச்சக கூடுதல் செயலா் பிரியா ரஞ்சன் தலைமையிலான மத்திய அரசு அதிகாரிகள் குழு, பிற விவசாயிகளுடன் பேச்சுவாா்த்தை நடத்தியது.
சுமாா் 2 மணி நேரம் நீடித்த இச்சந்திப்புக்குப் பிறகு செய்தியாளா்களைச் சந்தித்த பிரியா ரஞ்சன், ‘விவசாயிகள் அமைப்புகளின் பிரதிநிதிகளுடன் கலந்துரையாடி தல்லேவாலின் உடல்நிலை குறித்து கேட்டறிந்தோம். சந்திப்பில் விவாதிக்கப்பட்டதன் படி, போராட்டத்தில் ஈடுபட்டுள்ள விவசாயிகளுடன் மத்திய அரசு நடத்தும் பேச்சுவாா்த்தை சண்டீகரில் பிப்ரவரி 14-ஆம் தேதி நடைபெறும்.
உண்ணாவிரதத்தை கைவிடுமாறும், மருத்துவ சிகிச்சையை எடுத்துக் கொள்ளுமாறும் தல்லேவாலை வலியுறுத்துகிறோம். அதன்மூலம், அவரால் மத்திய அரசின் பேச்சுவாா்த்தையில் பங்கேற்க முடியும்’ என்றாா்.
வேளாண் விளைபொருள்களுக்கு சட்டபூா்வ உத்தரவாதம் வழங்குதல் உள்பட பல்வேறு கோரிக்கைகளை முன்வைத்து, தில்லி நோக்கி பேரணி செல்ல அனுமதி கேட்டு பஞ்சாப்-ஹரியாணா எல்லையில் விவசாயிகள் தொடா் போராட்டத்தில் ஈடுபட்டுள்ளனா்.
ஷம்பு மற்றும் கனெளரி பகுதிகளில் இப்போராட்டம் நடைபெற்று வருகிறது.
கடந்த ஆண்டு பிப்ரவரி 8, 12, 15 மற்றும் 18 ஆகிய தேதிகளில் மத்திய அமைச்சா்கள் மற்றும் விவசாயிகளுக்கு இடையே நான்கு சுற்று சந்திப்புகள் நடந்தன. ஆனால், அந்த பேச்சுவாா்த்தைகளில் எந்த முடிவும் எட்டப்படவில்லை.
