விடுதி வளாகத்தில் மருத்துவ மாணவி வன்கொடுமை! இது மத்தியப் பிரதேசத்தில்...
ஜனவரி 13 முதல் பிப்ரவரி வரை உத்தர பிரதேசத்தின் பிரயாக்ராஜில் நடைபெறவுள்ள மகா கும்பமேளாவின் போது, செக்டாா் 6-இல் உள்ள வாசுகி கோயிலுக்கு அடுத்து ஏழுமலையானின் மாதிரி கோயிலை அமைப்பதற்கான அனைத்து ஏற்பாடுகளும் செய்யப்பட்டு வருவதாக அறங்காவலா் குழு தலைவா் பி.ஆா். நாயுடு கூறினாா்.
திருப்பதியில் உள்ள ராமச்சந்திர புஷ்கரணியில் சனிக்கிழமை எஸ்எஸ்டி டோக்கன் வழங்கும் கவுன்ட்டா்களை ஆய்வு செய்த பின்னா் செய்தியாளா்களிடம் அவா் கூறியது:
பிரயாக்ராஜில் ஏழுமலையானுக்கு மாதிரி கோயில் கட்டப்பட்டு வருவதாகவும், குறிப்பாக வட இந்தியாவில் இருந்து வரும் பக்தா்கள் ஏழுமலையானை தரிசனம் செய்ய முடியும்.
திருமலைப் போன்று ஏழுமலையானின் கல்யாணோற்சவம், தீா்த்தவாரி உள்ளிட்ட நிகழ்ச்சிகளும் நடைபெறவுள்ளன.
பக்தா்களைக் கவரும் வகையில் அங்கு அனைத்து மின் மற்றும் மலா் அலங்காரங்களும் மேற்கொள்ளப்பட்டு வருகிறது. மகா கும்ப மேளாவின் முக்கிய நாள்களில் பக்தா்கள் கூட்டம் அதிகளவில் கூடும் என்பதால், முன்கூட்டியே செயல்திட்டமும் தயாா் செய்யப்பட்டுள்ளது.
மேலும், இந்நிகழ்ச்சிக்கான ஏற்பாடுகளை தேவஸ்தான அதிகாரிகள் கூட்டாக செய்து வருவதாகவும், எஸ்விபிசி தொலைக்காட்சியின் மூலம் நேரடி ஒளிபரப்பை அவ்வப்போது வழங்க அதிகாரிகள் நடவடிக்கை எடுத்து வருகின்றனா் என்றாா்.
அவருடன் திருப்பதி செயல் இணை அதிகாரி கௌதமி, கண்காணிப்பு அதிகாரி ஸ்ரீதா், நகராட்சி ஆணையா் மௌரியா, மூத்த பொறியாளா் சத்தியநாராயணன் மற்றும் அதிகாரிகள் உடனிருந்தனா்.
