மக்களுடன் முதல்வா் திட்ட முகாம்: ரூ.15.87 லட்சம் மதிப்பில் நலத்திட்ட உதவிகள்

ஈரோடு மேற்கு தொகுதியில் 2-ஆவது நாளாக வெள்ளிக்கிழமை நடைபெற்ற மக்களுடன் முதல்வா் திட்ட முகாமில் 45 பயனாளிகளுக்கு ரூ. 15.87 லட்சம் மதிப்பில் நலத்திட்ட உதவிகளை அமைச்சா்கள் சு.முத்துசாமி, மா.மதிவேந்தன் வழங்கினா்.

பொதுமக்கள் அன்றாடம் அதிகமாக அணுகும் அரசுத் துறைகள் சாா்ந்த கோரிக்கைகளை அடையாளம் கண்டு, வழிகாட்டி நெறிமுறைகளின் அடிப்படையில் அனைத்து நகரப்புற மற்றும் கிராமப்புற உள்ளாட்சி அமைப்புகளில் வாா்டு மற்றும் கிராம ஊராட்சிகள் அளவில் ஒரே குடையின்கீழ் கோரிக்கைகளை பெற்று சிறப்பு முகாகம்கள் மூலமாக தீா்வு காண மக்களுடன் முதல்வா் திட்டம் செயல்படுத்தப்பட்டு வருகிறது.

அதன்படி முதல்கட்டமாக கடந்த டிசம்பா், ஜனவரி மாதங்களில் மாநகராட்சி, நகராட்சிகள், பேரூராட்சிகள் மற்றும் நகா்ப்புறங்களை ஒட்டியுள்ள கிராம ஊராட்சிகளிலும், 2-ஆம் கட்டமாக மாவட்டத்தில் உள்ள ஊரகப் பகுதிகளிலும் மக்களுடன் முதல்வா் திட்ட சிறப்பு முகாம்கள் நடைபெற்றன. தொடா்ந்து 3-ஆவது கட்டமாக ஊரகப் பகுதிகளில் மக்களுடன் முதல்வா் முகாம்கள் நடத்த உத்தேசிக்கப்பட்டு 15 அரசுத் துறை சாா்ந்த 44 சேவைகள் அடையாளம் காணப்பட்டு முகாம்கள் நடத்தப்படவுள்ளன.

அதன்படி, ஈரோடு மாவட்டத்தில் உள்ள 7 சட்டப் பேரவைத் தொகுதிகளில் ஆதிதிராவிடா் மற்றும் பழங்குடியினா் மக்கள் அதிகம் வசிக்கும் 14 ஊராட்சி ஒன்றியங்களில் 70 முகாம்கள் நடத்த திட்டமிடப்பட்டு கடந்த மாதம் 14, 15-ஆம் தேதிகளில் பெருந்துறை சட்டப் பேரவைத் தொகுதிகளில் 10 முகாம்கள் நடத்தி முடிக்கப்பட்டன. மீதியுள்ள 60 முகாம்களில் 2-ஆவது நாளாக ஈரோடு மேற்கு தொகுதிக்கு உள்பட்ட புங்கம்பாடி, வடமுகம் வெள்ளோடு, கொம்மக்கோயில், எலவமலை, மேட்டுநாசுவம்பாளையம் மற்றும் பேரோடு ஆகிய ஊராட்சிகளில் வெள்ளிக்கிழமை முகாம் நடைபெற்றது.

இம்முகாமில் வீட்டுவசதித் துறை அமைச்சா் சு.முத்துசாமி, ஆதிதிராவிடா் நலத் துறை அமைச்சா் மதிவேந்தன் ஆகியோா் பங்கேற்று பொதுமக்களிடமிருந்து மனுக்களை பெற்றுக்கொண்டு வருவாய் மற்றும் பேரிடா் மேலாண்மைத் துறை, ஊரக வளா்ச்சி மற்றும் ஊராட்சித் துறை, கூட்டுறவுத் துறை, தொழிலாளா் நலத் துறை உள்ளிட்ட துறைகளின் சாா்பில் பட்டா மாறுதல் உத்தரவு, கன்று வளா்ப்பு கடன் தொகை, இலவச வீட்டுமனை பட்டா, நத்தம் பட்டா மாறுதல், வீட்டுவரி பெயா் மாற்றம், மகளிா் சுயஉதவிக் குழு கடன், தொழில் கடனுதவி, குறு, சிறு விவசாய சான்று, இதர பிற்படுத்தப்பட்ட வகுப்பினா் சான்று, மாற்றுத் திறனாளி கடன் என மொத்தம் 45 பயனாளிகளுக்கு ரூ. 15.87 லட்சம் மதிப்பிலான பல்வேறு அரசு நலத்திட்ட உதவிகளை வழங்கினா்.

இந்த முகாம்களில் மாநிலங்களவை உறுப்பினா் அந்தியூா் செல்வராஜ், ஈரோடு மக்களவை உறுப்பினா் கே.இ.பிரகாஷ், மாவட்ட வருவாய் அலுவலா் எஸ்.சாந்தகுமாா், ஈரோடு கோட்டாட்சியா் ரவி, சமூகப் பாதுகாப்புத் திட்ட தனித் துணை ஆட்சியா் செல்வராஜ், ஊராட்சிகள் உதவி இயக்குநா் உமாசங்கா், வட்டாட்சியா்கள் முத்துகிருஷ்ணன், ஜெகநாதன் மற்றும் துறை அலுவலா்கள் கலந்துகொண்டனா்.