பெருந்துறை அருகே வடமாநில பெண்ணை கொலை செய்த இருவரை போலீஸாா் கைது செய்தனா்.
ஈரோடு மாவட்டம், பெருந்துறையை அடுத்த நல்லமுத்தாம்பாளையத்தைச் சோ்ந்த வாழை இலை வியாபாரி கோபாலகிருஷ்ணன். இவருக்கு, அதே பகுதியில் வாழைத் தோட்டம் உள்ளது. இந்நிலையில், வாழை இலை அறுப்பதற்காக கோபாலகிருஷ்ணன் புதன்கிழமை தோட்டத்துக்கு சென்றாா். அங்கு உடல் அழுகிய நிலையில்,பெண்ணின் உடல் கிடந்தது. இது குறித்து, அவா், பெருந்துறை போலீஸாருக்கு தகவல் தெரிவித்தாா்.
சம்பவ இடத்துக்கு வந்த போலீஸாா் உடலை மீட்டு உடற்கூறாய்வுக்காக பெருந்துறை அரசு மருத்துவக் கல்லூரி மருத்துவமனைக்கு அனுப்பிவைத்தனா். விசாரணையில், அப்பெண் மேற்கு வங்க மாநிலத்தைச் சோ்ந்த ரூபாஜோதி மண்டல் மனைவி சிபானி தாஸ் மண்டல் (38) என்பதும், கடந்த 6 ஆண்டுகளாக பெருந்துறையை அடுத்த பணிக்கம்பாளையத்தில் தங்கி கூலி வேலை செய்து வந்ததும் தெரியவந்தது. இவருக்கு 19 வயதில் ஒரு மகன் உள்ளாா்.
இந்நிலையில், உடற்கூறாய்வில் சிபானி தாஸ் மண்டல் கழுத்து நெரிக்கப்பட்டு கொலை செய்யப்பட்டது தெரியவந்தது. இதையடுத்து தோட்டம் அருகே பொருத்தப்பட்டிருந்த சிசிடிவி கேமரா காட்சிகளை போலீஸாா் கைப்பற்றி விசாரணை நடத்தினா்.
விசாரணையில், மேற்கு வங்க மாநிலத்தைச் சோ்ந்த ஜட்டே மண்டல் (24) ஜெயன்சாட் காஜி (38) ஆகியோா் அதிக பணம் தருவதாக ஆசை வாா்த்தை கூறி சிபானி தாஸ் மண்டலை, நல்லமுத்தாம்பாளையத்துக்கு அழைத்துச் சென்று பாலியல் பலாத்காரம் செய்துள்ளனா். அப்போது, சிபானி தாஸ் மண்டல் அணிந்திருந்த தங்க வளையல்களையும், கைப்பேசியையும் இருவரும் பறிக்க முயன்றபோது, அவா்களுக்குள் ஏற்பட்ட தகராறில் சிபானி தாஸ் மண்டலை துப்பட்டாவால் கழுத்தை நெரித்து இருவரும் கொன்றது தெரியவந்தது.
இதையடுத்து, போலீஸாா் இருவரையும் வெள்ளிக்கிழமை கைது செய்து, நீதிமன்றத்தில் ஆஜா்படுத்தி கோபியில் உள்ள மாவட்ட சிறையில் அடைத்தனா்.
