மதச்சார்பற்ற மக்களை ஒருங்கிணைக்க வேண்டும்: பிரகாஷ்காரத்

விழுப்புரம்: மத அடிப்படையில் மக்களைப் பிரித்து சாதகமாக்கிக் கொள்ள பாஜக செயல்படுகிறது. இதை ஒடுக்க மதச்சார்பற்ற மக்களை ஒன்றிணைக்க வேண்டும் என்றார் மார்க்சிஸ்ட் கம்யூனிஸ்ட் கட்சியின் அரசியல் தலைமைக்குழு ஒருங்கிணைப்பாளர் பிரகாஷ்காரத்.

விழுப்புரத்தில் மாா்க்சிஸ்ட் கம்யூனிஸ்ட் கட்சியின் 24-ஆவது மாநில மாநாடு வெள்ளிக்கிழமை தொடங்கியது.

இதைத் தொடர்ந்து மாலையில் புதிய பேருந்து நிலையம் அருகிலுள்ள நகராட்சித் திடல் பகுதியில் நடைபெற்ற பொதுக்கூட்டத்துக்கு மாவட்டச் செயலர் என்.சுப்பிரமணியன் தலைமை வகித்தார். மாநிலச் செயற்குழு உறுப்பினர்கள் கே.பாலபாரதி, டி. ரவீந்திரன் முன்னிலை வகித்தனர்.

மாா்க்சிஸ்ட் அரசியல் தலைமைக் குழு ஒருங்கிணைப்பாளா் பிரகாஷ் காரத் சிறப்புரையாற்றினார்.

அப்போது, இந்துத்துவ வகுப்புவாத சித்தாந்தத்தை பதிவு செய்யும் நோக்கில் பாஜகவினர் செயல்படுகின்றனர். மத்திய பாஜக அரசு வகுப்புவாத, மதவெறி கொண்ட அரசாக உள்ளது. பாஜக ஆளும் மாநிலங்களில் ஆர்.எஸ்.எஸ். கோட்பாடுகளை செயல்படுத்துகின்ற வகையிலேயே அதன் செயல்பாடுகள் உள்ளன. இஸ்லாமியர்களின் மசூதிகளின் கீழ்பகுதியில் கோவில் இருந்ததாகக் கூறி,பாஜகவினர் கருத்துகளை எழுப்புகின்றனர். இதன் மூலம் மோதலை ஏற்படுத்தும் செயல்களில் அவர்கள் ஈடுபட்டு வருகின்றனர்.

பாஜக, ஆா்எஸ்எஸ் அமைப்பும் இந்துக்கள்- முஸ்லிம்கள் என்ற மத அடிப்படையில் அரசியலை நகர்த்துகின்றன. இதன் காரணமாக மக்களவைத் தேர்தலில் உத்தரப்பிரதேச மாநிலத்தில் பாஜக பின்னடைவை சந்தித்தது. பாபர் மசூதியை இடித்து ராமர் கோவில் கட்டிய அயோத்தி தொகுதியில் பாஜக தோல்வியை சந்தித்தது. மத அடிப்படையில் மக்களைப் பிரித்து, அதை தங்களுக்கு சாதகமாக்கிக் கொள்ளுமம் வகையில் பாஜக செயல்படுகிறது. இதனை ஒடுக்குவதற்கு மதச்சார்ப்பற்ற மக்களை நாம் ஒன்றிணைக்க வேண்டும்.

மத அடிப்படையில் மக்களைப் பிரித்து அரசியல் செய்யும் பாஜக, மற்றொரு பக்கம் பெரும் நிறுவனங்களுக்கு ஆதரவாக செயல்படும் அரசாக உள்ளது. இதனால் சமூக,பொருளாதார ஏற்றத் தாழ்வு ஏற்படுகிறது. அனைத்தையும் தனியார்மயமாக்கும் செயலில் மத்திய அரசு ஈடுபடுவதால் தொழிலாளிகள், விவசாயிகள் என அனைத்துத் தரப்பினரும் பாதிக்கப்படுகின்றனர்.

தமிழகத்தில் பாஜக தோற்கடிக்க வேண்டும், தனிமைப்படுத்த வேண்டும் என்று மார்க்சிஸ்ட் கம்யூனிஸ்ட் கட்சி செயல்படுகிறது. 2019 மக்களவைத் தேர்தலிலும், 2021 சட்டப்பேரவைத் தேர்தலிலும் தமிழகத்தில் மதச்சார்பற்ற அணி வெற்றிபெற்றது. தமிழகத்தில் கால் ஊன்ற ஆர்.எஸ்.எஸ்., பாஜக செயல்பட்டுக் கொண்டிருக்கிறது. மக்களிடம் இந்துத்துவாவை திணிக்கப் பார்த்தார்கள். ஆனால், அது அவர்களால் முடியவில்லை. நம் கூட்டணி பலமாக இருந்தது.

மத்தியில் ஆளும் பாஜக அரசு தனது தவறான கொள்கைகளை முன்னெடுக்கும் போது, மாநிலத்தில் ஆளும் திமுக அரசு அதை மக்களுக்கு எடுத்துக் காட்டும் போது மார்க்சிஸ்ட் கம்யூனிஸ்ட் கட்சி அவர்களுக்கு உறுதுணையாக இருந்தது. அதே நேரத்தில் தமிழகத்தில் சாம்சங்க் நிறுவனத்தில் தொழிற்சங்கம் தொடங்குவதற்காக தொழிலாளர்கள் போராட்டத்தில் ஈடுபட்டனர். அவர்களின் அடிப்படை உரிமைக்காக போராடினார்கள். இது இந்தியத் தொழிற்சங்கப் போராட்டத்தில் முத்திரைப் பதித்த போராட்டமாக இருந்தது. தொழிலாளர் சங்கத்தை பதிவு செய்ய திமுக அரசு மறுத்து வருவது வேதனையாக உள்ளது.

மேற்கு வங்க மாநிலத்தில் ஆட்சி செய்த ஜோதிபாசு, அமெரிக்காவில் தொழில் முதலீட்டை ஈர்க்கச் சென்ற போது மேற்கு வங்கத்துக்கு தொழிற்சாலைகளை அமைக்க வரலாம். அதே நேரத்தில் தொழிலாளர் நலச்சட்டங்களுக்கு முன்னுரிமை அளிப்போம் என்று நிபந்தனை அளித்து அதை செயல்படுத்தி வந்தார். அது மிகச்சிறந்த மாடல். அதுபோன்று திமுக அரசும் இருக்க வேண்டும் என்றார் பிரகாஷ் காரத்.

இதையும் படிக்க | பள்ளி கழிவுநீா்த் தொட்டியில் தவறி விழுந்து சிறுமி உயிரிழந்த வழக்கில் 3 பேர் கைது

மார்க்சிஸ்ட் கம்யூனிஸ்ட் மாநிலச் செயலர் கே.பாலகிருஷ்ணன் பேசியது:

அண்ணா பல்கலைக்கழக மாணவி பாலியல் வன்கொடுமை நிகழ்வை அரசியல் செய்ய பாஜக நினைக்கிறது. தமிழகத்தில் அண்ணா பல்கலைக்கழக மட்டுமல்ல, நாட்டின் எந்த பகுதியிலும் பெண்களுக்கு எதிரான பாலியல் வன்கொடுமை சம்பவங்கள் நிகழும் போது அதற்கு எதிராக போராடும் இயக்கமாக மார்க்சிஸ்ட் கம்யூனிஸ்ட் கட்சி இருந்து வருகிறது.

அண்ணா பல்கலைக்கழக மாணவி பாலியல் வன்கொடுமை நிகழ்வை அரசியலாக்கும் செயலில் பாஜக மாநிலத் தலைவர் அண்ணாமலை ஈடுபடுகிறாரே.கடந்த ஆட்சிக்காலத்தில் பொள்ளாச்சியில் பாலியல் வன்கொடுமை நிகழ்ந்த போது அப்போதைய அரசை எதிர்த்து போராடினாரா?, அப்போது எங்கே சென்றிருந்தார் அவர்.

பாஜக-ஆர்எஸ்எஸ்ஸுக்கு எதிராக, பாசிச ஆட்சிக்கு எதிராக திமுகவுடன் இணைந்து நாங்கள் போராடி வருகிறோம். இந்தியா கூட்டணியில் இணைந்து பயணிக்கிறோம். அதே நேரத்தில் தமிழகத்தில் பட்டா கேட்டு போராடினால், தொழிலாளர்கள்உரிமைக்காக போராடினால் உடனடியாக காவல்துறையினர் வழக்குப்பதிவு செய்கின்றனர். தமிழகத்தில் அறிவிக்கப்படாத அவசரநிலை உள்ளதா என்ற கேள்வி எழுகிறது.

விழுப்புரத்தில் மார்க்சிஸ்ட் கம்யூனிஸ்ட் கட்சியின் மாநாட்டு பேரணிக்கு அனுமதி மறுத்து, கடைசி நேரத்தில் அனுமதி தந்தீர்கள்.பின்னர் கட்சியின் நிர்வாகிகளை அழைத்து பேரணிக்கு அனுமதியில்லை எனக் கூறுவது ஏன். எதிர்க்கட்சியாக இருந்தாலும் எல்லா கட்சிகளும் நடத்துகிற போராட்டங்களுக்கு அனுமதியளிக்க வேண்டும். ஏன் அஞ்சுகிறீர்கள். இந்த நிலை மாற வேண்டும். தமிழகத்தில் பல்வேறு மாடல்கள் இருந்தாலும் இடதுசாரிகள் மாடல்தான் சிறந்தது என்றார் அவர்.

பொதுக்கூட்டத்தில் அரசியல் தலைமைக்குழு உறுப்பினர் ஜி.ராமகிருஷ்ணன், மத்தியக்குழு உறுப்பினர் உ.வாசுகி உள்ளிட்டோர் பேசினர்.

பொதுக்கூட்டத்தில் மதுரை எம்.பி. சு.வெங்கடேசன், கட்சியின் மூத்த தலைவர் சௌந்தர்ராஜன் உள்ளிட்டோர் பேசினர்.

முன்னதாக, மாவட்டச்செயற்குழு உறுப்பின பி.குமார் வரவேற்றார். நிறைவில் விழுப்புரம் வட்டச் செயலர் ஆர்.கண்ணப்பன் நன்றி கூறினார்.