மதுரையில் மு.க. அழகிரி இல்லத்தில் முதல்வா் ஸ்டாலின்

மதுரையில் உள்ள முன்னாள் மத்திய அமைச்சா் மு.க. அழகிரியின் இல்லத்துக்கு முதல்வா் மு.க. ஸ்டாலின் சனிக்கிழமை இரவு வந்தாா்.

திமுகவின் தென் மண்டல அமைப்புச் செயலராக செயல்பட்டவா் மு.க. அழகிரி. உள்கட்சி பிரச்னை காரணமாக, கடந்த 2014-ஆம் ஆண்டில் மு.க. அழகிரி திமுகவிலிருந்து நீக்கப்பட்டாா். பிறகு, அவா் தீவிர அரசியலில் இருந்து விலகியிருந்தாா். இருப்பினும், தமிழக முதல்வராக மு.க. ஸ்டாலின் பொறுப்பேற்ற போது, மு.க. அழகிரி மகிழ்ச்சி தெரிவித்திருந்தாா். இதேபோல, முதல் முறையாக அமைச்சராகப் பொறுப்பேற்ற உதயநிதி ஸ்டாலின், கடந்த 2023-ஆம் ஆண்டு ஜனவரி மாதம் மதுரைக்கு வந்தபோது தனது பெரியப்பா மு.க. அழகிரியின் இல்லத்துக்குச் சென்று வாழ்த்துப் பெற்றாா்.

இந்த நிலையில், மு.க. அழகிரியின் மகன் தயாநிதி அழகிரி கடந்தாண்டு உடல்நலக் குறைவுக்கு உள்ளானாா். வேலூா் கிறிஸ்தவ மருத்துவக் கல்லூரியில் சிகிச்சைக்கு அனுமதிக்கப்பட்டிருந்த அவரை, தமிழக முதல்வா் மு.க. ஸ்டாலின் சந்தித்து நலம் விசாரித்தாா்.

இந்த நிகழ்வுகள் காரணமாக, முதல்வா் மு.க. ஸ்டாலினுக்கும், மு.க. அழகிரிக்கும் இடையே இருந்த மனக்கசப்புகள் விலகிவிட்டதாகக் கூறப்பட்டது. இதை உறுதி செய்யும் வகையில், மதுரைக்கு சனிக்கிழமை வந்த தமிழக முதல்வா் மு.க.ஸ்டாலின், டி.வி.எஸ். நகரில் உள்ள தனது அண்ணன் மு.க. அழகிரியின் இல்லத்துக்குச் சென்றாா்.

நீண்டகால இடைவெளிக்குப் பிறகு தனது இல்லத்துக்கு வந்த மு.க. ஸ்டாலினை நுழைவு வாயிலில் காத்திருந்து அழகிரி, வரவேற்று அழைத்துச் சென்றாா்.

அரசியல் முக்கியத்துவம்?

மதுரையில் ஞாயிற்றுக்கிழமை (ஜூன் 1) நடைபெறும் திமுகவின் மாநிலப் பொதுக் குழுக் கூட்டம், 2026 சட்டப்பேரவைத் தோ்தலுக்கு முந்தைய கூட்டம் என்ற வகையில் அரசியல் முக்கியத்துவம் வாய்ந்ததாகக் கருதப்படுகிறது. இந்த நிலையில், பொதுக் குழுக் கூட்டத்துக்கு முந்தைய நாளில் மு.க. அழகிரியை முதல்வா் ஸ்டாலின் சந்தித்ததற்கு அரசியல் முக்கியத்துவம் இருக்கலாம் எனக் கூறப்படுகிறது.