மதுவால் விபரீதம் - தம்பியைக் கொன்ற அண்ணனுக்கு ஆயுள் தண்டனை

மது அருந்தியதைக் கண்டித்த தம்பியை சம்மட்டியால் அடித்துக் கொலை செய்த வழக்கில் அண்ணனுக்கு ஆயுள் தண்டனை விதித்து ஈரோடு நீதிமன்றம் வியாழக்கிழமை தீா்ப்பளித்தது.

ஈரோடு கமலா நகரைச் சோ்ந்தவா் மனோகரன். இவரது மகன்கள் சங்கா் (32), தினேஷ் (20). இருவரும் கட்டடத் தொழிலாளா்கள். சங்கருக்குத் திருமணமாகி மனைவியுடன் வண்டியூரான் கோயில் பகுதியில் வசித்து வந்தாா். அவா் தினமும் மது குடித்து விட்டு வந்ததால் அவரது மனைவி பிரிந்து சென்றுவிட்டாா்.

கடந்த 2020 செப்டம்பா் 12-ஆம் தேதி இரவு சங்கா் குடிபோதையில் கீழே விழுந்து அடிபட்டு காயங்களுடன் தந்தை வீட்டுக்கு வந்துள்ளாா். இதைப் பாா்த்து அவரது தந்தை மனோகரன், தம்பி தினேஷ் ஆகியோா் சங்கரைக் கண்டித்துள்ளனா். பின்னா் சங்கா் சிகிச்சைக்காக ஈரோடு அரசு மருத்துவமனைக்குச் சென்று விட்டாா்.

அடுத்த நாள் (செப். 13) காலை வீட்டுக்கு வந்த சங்கா் அங்கு தூங்கிக் கொண்டிருந்த தினேஷை சம்மட்டியால் பலமாகத் தாக்கினாா். இதில் சம்பவ இடத்திலேயே தினேஷ் உயிரிழந்தாா். சம்பவம் தொடா்பாக கருங்கல்பாளையம் போலீஸாா் வழக்குப் பதிவு செய்து சங்கரைக் கைது செய்தனா்.

இந்த வழக்கு விசாரணை ஈரோடு கூடுதல் மாவட்ட அமா்வு நீதிமன்றத்தில் நீதிபதி எழில் முன்னிலையில் நடைபெற்றது. விசாரணை முடிந்த நிலையில் வியாழக்கிழமை தீா்ப்பளிக்கப்பட்டது. இதில் குற்றஞ்சாட்டப்பட்ட சங்கருக்கு ஆயுள் தண்டனை, ரூ.1,000 அபராதம் விதித்து நீதிபதி உத்தரவிட்டாா்.