மயிலாடுதுறை அரசு மருத்துவமனையில் ஆட்சியா் ஆய்வு

மயிலாடுதுறை அரசினா் பெரியாா் மாவட்ட தலைமை மருத்துவமனையில் மாவட்ட ஆட்சியா் ஹெச்.எஸ். ஸ்ரீகாந்த் புதன்கிழமை ஆய்வு செய்தாா்.

அப்போது, அவசர சிகிச்சைப் பிரிவு, புறநோயாளிகள் பிரிவு, கண் மருத்துவ பிரிவு, குழந்தைகளுக்கான புறநோயாளிகள் பிரிவு, மருத்துவ ஆலோசனை அறை உள்ளிட்ட இடங்களில் ஆட்சியா் ஆய்வு செய்து பொதுமக்களுக்கு வழங்கப்படும் மருத்துவ சேவைகள் குறித்து கேட்டறிந்தாா்.

தொடா்ந்து, பொதுமக்கள் பயன்பாட்டுக்கு ஏற்றவாறு கழிப்பறை தூய்மையாக உள்ளனவா எனவும், குடிநீா் மற்றும் மின்விளக்கு வசதிகள் உள்ளனவா என்பதையும், புறநோயாளிகள் பெயா் பதிவேடு, மருத்துவா்கள் மற்றும் செவிலியா்கள் வருகைப் பதிவேடு, மருந்தகம் உள்ளிட்டவைகளையும் ஆட்சியா் ஆய்வு செய்தாா்.

தினசரி பொதுமக்களுக்கு வழங்கப்படும் மருத்துவ சேவைகள், அதன்மூலம் பயன்பெறுபவா்கள் விவரங்கள் குறித்து தலைமை மருத்துவரிடம் கேட்டறிந்தாா். ஆய்வின்போது, சுகாதார துறை இணை இயக்குநா் பானுமதி, தலைமை மருத்துவா் மருதவானன் ஆகியோா் உடன் இருந்தனா்.