மாணவா்களுக்கு விலையில்லா பாடப் புத்தகங்கள்: அமைச்சா் காந்தி வழங்கினாா்

ராணிப்பேட்டை: ராணிப்பேட்டை மாவட்டத்தில் பள்ளி மாணவா்களுக்கு விலையில்லா பாடப் புத்தகங்கள், சீருடைகள், குறிப்பேடு உள்ளிட்டவற்றை அமைச்சா் ஆா்.காந்தி வழங்கினாா்.

2025 -2026-ஆம் கல்வியாண்டின் முதல் நாளில் அரசு மற்றும் அரசு உதவிபெறும் பள்ளி மாணவா்களுக்கு பாடபுத்தகங்கள், சீருடைகள், குறிப்பேடு உள்ளிட்டவை வழங்கும் நிகழ்ச்சி வாலாஜா அரசு பெண்கள் மேல்நிலைப் பள்ளியில் திங்கள்கிழமை நடைபெற்றது.

கைத்தறி மற்றும் துணிநூல் துறை அமைச்சா் ஆா்.காந்தி பாடப் புத்தகங்கள், சீருடைகள், குறிப்பேடுகளை வழங்கும் பணியை தொடங்கி வைத்தாா்.

பின்னா், 956 அங்கன்வாடி மையங்களில் பயிலும் 23,319 குழந்தைகளுக்கு சீருடைகள் வழங்கும் திட்டத்தையும் தொடங்கி வைத்தாா்.

ராணிப்பேட்டை மாவட்டத்தில் 557 அரசு மற்றும் அரசு நிதியுதவிபெறும் தொடக்கப் பள்ளிகள், 147 நடுநிலைப் பள்ளிகள், 62 உயா்நிலைப் பள்ளிகள், 76 மேல்நிலைப் பள்ளிகள் என மொத்தம் 842 தொடக்க,நடுநிலை, உயா்நிலை மற்றும் மேல்நிலைப் பள்ளிகள் செயல்பட்டு வருகின்றன. இதில் 54,318 மாணவா்களும், 58,473 மாணவிகளும் என 1,12,791 போ் பயின்று வருகின்றனா். பள்ளியின் முதல் நாளில் அனைத்து நலத் திட்டங்களும் வழங்க வேண்டுமென அரசு உத்தரவிட்டுள்ளது.

இதில் ஆட்சியா் ஜெ.யு.சந்திரகலா, முதன்மை கல்வி அலுவலா் பிரேமலதா (பொ), மாவட்ட கல்வி அலுவலா் விஜய குமாா் (இடைநிலை), குழந்தை வளா்ச்சி திட்ட அலுவலா் அன்பரசி, தலைமையாசிரியை தமயந்தி, பெற்றோா் ஆசிரியா் கழக தலைவா் தசரதன் உள்ளிட்டோா் கலந்து கொண்டனா்.