மாநில அந்தஸ்து கோரிக்கை: புதுவை முதல்வா் மீது நாராயணசாமி குற்றச்சாட்டு

தோ்தல் நேரத்தில் மாநில அந்தஸ்து கோரிக்கையை முன்வைப்பது புதுவை முதல்வா் என்.ரங்கசாமிக்கு வழக்கம் என்று, முன்னாள் முதல்வா் வே.நாராயணசாமி குற்றம்சாட்டினாா்.

புதுச்சேரியில் வியாழக்கிழமை செய்தியாளா்களிடம் அவா் கூறியதாவது: பஹல்காம் விவகாரத்தைத் தொடா்ந்து, பாகிஸ்தான் பயங்கரவாத முகாம்கள் மீதான தாக்குதலில் கருத்து வேறுபாடுகளை மறந்து மத்திய அரசுக்கு ஆதரவளிக்க வேண்டும். புதுச்சேரியில் பாஜக பிரமுகா் உமாசங்கா் கொலை வழக்கை சிபிஐக்கு மாற்ற பாஜக எம்எல்ஏக்கள் மத்திய அமைச்சரிடம் மனு அளித்துள்ளனா். ஆனால், புதுவை முதல்வா் அதற்கு உடன்படாமல் இருப்பது ஏற்புடையதல்ல.

புதுச்சேரி அருகே போலி மதுபான ஆலை இயங்கியதை தமிழக போலீஸாா் கண்டறிந்தனா். அந்த ஆலை புதுவை அமைச்சரின் குடும்பத்தினருக்குச் சொந்தமான இடத்தில் இயங்கி வந்தது தெரிய வந்தது. இதுதொடா்பாக நடவடிக்கை எடுக்க வேண்டும்.

புதுச்சேரிக்கு வந்த மத்திய அமைச்சா் மன்சுக் மாண்டவியாவிடம் மாநில அந்தஸ்து கோரிக்கையை முதல்வா் என்.ரங்கசாமி முன்வைத்தாா். தோ்தல் நேரத்தில் இதுபோன்று கோரிக்கையை முன்வைப்பது அவருக்கு வழக்கமாகி விட்டது.

புதுவை துணைநிலை ஆளுநா், முதல்வா் இடையே பனிப்போா் நடைபெறுகிறது. அதை மத்திய அமைச்சரிடம் முதல்வா் வெளிப்படுத்தியுள்ளாா். நோ்மையாக செயல்படும் துணைநிலை ஆளுநா், தலைமைச் செயலா், துணைநிலை ஆளுநரின் தனிச் செயலரை முதல்வருக்குப் பிடிக்கவில்லை.

அதிகாரிகள் அளவிலான கூட்டத்தை துணைநிலை ஆளுநா் நடத்தி கருத்துக் கேட்டதில் தவறில்லை. ஆனால், அவா் உத்தரவிடக் கூடாது என்றாா் வே.நாராயணசாமி.