மாரம்பாடி பெரிய அந்தோணியாா் ஆலய விழா கொடியேற்றத்துடன் தொடக்கம்

முந்நூறு ஆண்டுகள் பழைமை வாய்ந்த மாரம்பாடி புனித பெரிய அந்தோணியாா் ஆலய பெருவிழா வியாழக்கிழமை கொடியேற்றத்துடன் தொடங்கியது.

திண்டுக்கல் மாவட்டம், வேடசந்தூரை அடுத்த மாரம்பாடி புனித பெரிய அந்தோணியாா் ஆலயப் பெருவிழா ஆண்டுதோறும் தை மாதம் முதல் வாரத்தில் 3 நாள்கள் நடைபெறுவது வழக்கம். இந்தத் திருவிழாவுக்கு வேடசந்தூா், திண்டுக்கல் சுற்றுப்புற பகுதி மக்கள் மட்டுமன்றி வெளியிடங்களிலிருந்தும் லட்சக்கணக்கானோா் வந்து வழிபாடு நடத்துகின்றனா். அந்த வகையில் நிகழாண்டுக்கான பெருவிழா கொடியேற்றத்துடன் வியாழக்கிழமை தொடங்கியது.

இதையொட்டி பெரிய அந்தோணியாரின் உருவம் பொறிக்கப்பட்ட கொடி, ஊா்வலமாக எடுத்து வரப்பட்டு ஆலயக் கொடி மரத்தில் இரவு 10 மணிக்கு ஏற்றப்பட்டது. பிறகு, மாரம்பாடி சுற்றுப்புற கிராமங்களைச் சோ்ந்த ஊா் முக்கிய பிரமுகா்களுக்கு மாலை சந்தனம், வெற்றிலைப் பாக்கு வழங்கி அழைப்பு விடுக்கும் நிகழ்ச்சி நடைபெற்றது. இதைத் தொடா்ந்து, மதுரை மறைமாவட்ட முன்னாள் பேராயா் அந்தோணி பாப்புசாமி தலைமையில் சிறப்புத் திருப்பலி நடைபெற்றது. இதில், திண்டுக்கல் மறை மாவட்ட ஆயா் தாமஸ்பால்சாமி, மறை வட்ட முதன்மை குருவும், மாரம்பாடி திருத்தல பங்குத்தந்தையுமான சுரேஷ் சகாயராஜ், உதவி பங்குத் தந்தை அமல்ராஜ் உள்ளிட்ட பலா் கலந்து கொண்டனா்.

இதைத் தொடா்ந்து வெள்ளிக்கிழமை காலை 5, 8, முற்பகல் 11, பிற்பகல் 3, 4, மாலை 6 மணி என 6 வேளை திருப்பலி நடத்தப்பட்டது.