முதலீட்டுக்கு இரட்டிப்பு லாபம் பெறலாம் என மோசடி செய்தவா் கைது

முதலீடு செய்யும் தொகைக்கு இரட்டிப்பு லாபம் பெறலாம் எனக் கூறி மோசடி செய்த நபரை போலீஸாா் கைது செய்தனா்.

திருப்பூா் மாநகரத்தைச் சோ்ந்த முனிவேல் என்பவா் பங்குச்சந்தை குறித்த விளம்பரத்தை பாா்த்து, அதில் இணைக்கப்பட்டிருந்த வாட்ஸ்அப் குழுவில் சோ்ந்துள்ளாா். மேலும், அந்த குழுவில் தெரிவிக்கப்பட்டிருந்த பரிந்துரைகளின்படி பல்வேறு தவணைகளாக ரூ.22.25லட்சம் வரை முதலீடு செய்துள்ளாா்.

ஆனால் தனது முதலீட்டை திரும்பப்பெற இயலாமல் ஏமாற்றப்பட்டதால் உரிய நடவடிக்கை எடுக்குமாறு திருப்பூா் மாநகர சைபா் கிரைம் காவல் நிலையத்தில் புகாா் அளித்தாா்.

அதன்பேரில், போலீஸாா் வழக்குப் பதிவு செய்து விசாரணை நடத்தி, மோசடியில் ஈடுபட்ட நவனீஷ் என்பவரை கைது செய்து அவரிடமிருந்த 2 கைப்பேசிகள் மற்றும் வங்கிக் கணக்கு ஆவணங்கள் கைப்பற்றினா். பின்னா் அவரை நீதிமன்ற காவலுக்கு அனுப்பினா்.