முதல்வா் இன்று மயிலாடுதுறை வருகை

மயிலாடுதுறை: மயிலாடுதுறையில் மாவட்டத்தில் பல்வேறு நிகழ்ச்சிகளில் பங்கேற்க தமிழ்நாடு முதல்வா் மு.க. ஸ்டாலின் செவ்வாய்க்கிழமை (ஜூலை 15) வருகிறாா்.

இதற்காக, சென்னையில் இருந்து ரயில் மூலம் சிதம்பரம் வரும் முதல்வா், அங்கு பல்வேறு நிகழ்ச்சிகளில் பங்கேற்றுவிட்டு, அங்கிருந்து சாலை மாா்க்கமாக செவ்வாய்க்கிழமை (ஜூலை 15) மதியம் மயிலாடுதுறை வருகிறாா். தொடா்ந்து, கொள்ளிடம் பாலம் அருகே சோதியக்குடியில் முன்னாள் முதல்வா் மு. கருணாநிதியின் உருவச் சிலையை திறந்து வைத்த பின்னா், திருவெண்காட்டில் தங்குகிறாா். பின்னா் மாலை அங்கிருந்து புறப்பட்டு மயிலாடுதுறையில் பூம்புகாா் சாலைமுதல் கச்சேரி சாலையில் உள்ள திமுக அலுவலகமான அண்ணா பகுத்தறிவு மன்றம் வரை ரோடு ஷோ நிகழ்ச்சியில் பங்கேற்று, புதுப்பிக்கப்பட்ட அண்ணா பகுத்தறிவு மன்றக் கட்டடத்தையும், அங்கு நிறுவப்பட்டுள்ள மு. கருணாநிதியின் முழுஉருவச் சிலையையும் திறந்துவைக்கிறாா்.

பின்னா், மாவட்ட ஆட்சியரகத்தில் புதிதாக கட்டப்பட்டுள்ள சுற்றுலா மாளிகையில் இரவு தங்குகிறாா். புதன்கிழமை (ஜூலை 16) வழுவூரில் நிறுவப்பட்டுள்ள மு. கருணாநிதியின் உருவச்சிலையை திறந்து வைத்த பின்னா், மன்னம்பந்தல் ஏவிசி கல்லூரியில் நடைபெறும் அரசு நிகழ்ச்சியில் பங்கேற்று, முடிவுற்ற பல்வேறு திட்டப் பணிகளை தொடங்கிவைத்து பொது மக்களுக்கு நலத்திட்ட உதவிகளை வழங்குகிறாா். நிகழ்ச்சியை முடித்து, மயிலாடுதுறையில் இருந்து மதியம் 1.10 மணிக்கு சோழன் விரைவு ரயில் மூலம் சென்னைக்கு செல்கிறாா்.