சொத்தை பறித்துக் கொண்டு துரத்திய மகன்கள் மீது நடவடிக்கை கோரி தம்பதி புகாா்

மயிலாடுதுறை: மயிலாடுதுறை அருகே வீடு, நிலத்தை பறித்துக் கொண்டு துரத்தியடித்த மகன்கள் மீது நடவடிக்கை எடுக்கக் கோரி மாவட்ட காவல் கண்காணிப்பாளா் அலுவலகத்தில் வயோதிக தம்பதி திங்கள்கிழமை புகாா் அளித்தனா்.

மயிலாடுதுறை மாவட்டம், பாலையூா் காவல் எல்லைக்குள்பட்ட காரனூரைச் சோ்ந்தவா் கிருஷ்ணமூா்த்தி (87). இவரது மனைவி சந்ரோதயம். இவா்களுக்கு ராமதாஸ், ஜெயக்குமாா் ஆகிய மகன்கள், ஒரு மகள் உள்ளனா். இந்நிலையில், இந்த தம்பதி தங்களுக்கு சொந்தமான 2 வீடுகள், 7 ஏக்கா் நிலம், 9 சவரன் நகை ஆகியவற்றை மகன்களுக்கு பிரித்து கொடுத்துள்ளனா். பின்னா் 2 மகன்களும் தந்தை, தாயை கவனிக்காமல் வீட்டை விட்டு வெளியேற்றியதாக கூறப்படுகிறது.

இதையடுத்து, மாவட்ட ஆட்சியா் அலுவலகத்தில் தம்பதி கடந்த ஏப்ரலில் அளித்த புகாரின் பேரில், பெற்றோா் மற்றும் மூத்த குடிமக்கள் பராமரிப்பு சட்டத்தின்படி 2 மகன்களும் மாதந்தோறும் தலா ரூ.10,000 வழங்க வேண்டும், 2 மகன்களில் யாா் வீட்டில் வசிக்க தம்பதியினா் விரும்புகிறாா்களோ அங்கு தங்க அனுமதிக்க வேண்டும் என மாவட்ட ஆட்சியா் ஹெச்.எஸ் .ஸ்ரீகாந்த் உத்தரவிட்டிருந்தாா்.

அதன்பின்னரும், 2 மகன்களும் பெற்றோரை பராமரிக்க மறுத்ததால், மாவட்ட காவல் கண்காணிப்பாளா் அலுவலகத்துக்கு வந்த இருவரும், மாவட்ட ஆட்சியா் உத்தரவிட்டும் மதிக்காத மகன்கள் மீது சட்ட நடவடிக்கை எடுக்க வேண்டும், வாழ வழியில்லாத எங்களை கருணைக் கொலை செய்ய ஆவண செய்ய வேண்டும் என மனு அளித்தனா். அவா்களது குறையைக் கேட்டறிந்த எஸ்பி கோ. ஸ்டாலின் உரிய நடவடிக்கை எடுக்க போலீஸாருக்கு உத்தரவிட்டாா்.