முதல்வா் மருந்தகம் மூலம் பயனடைந்த பயனாளியிடம் ஆட்சியா் கலந்துரையாடல்

நாகையில் முதல்வா் மருந்தகம் மூலம் பயனடைந்த பயனாளியிடம் நிறைந்தது மனம் திட்டத்தின் கீழ் மாவட்ட ஆட்சியா் ப. ஆகாஷ் புதன்கிழமை கலந்துரையாடி பயன்களை கேட்டறிந்தாா்.

நாகை மாவட்டத்தில் வேதாரண்யம் அருகே கருப்பம்புலம், கத்தரிப்புலம் மருதூா் வடக்கு, நாகை புதிய பேருந்து நிலையம், நாகூா் பிரதான சாலை (சந்திரா காா்டன்), சிக்கல், கீழ்வேளுா் ஆகிய 7 இடங்களில் தொழில் முனைவோா்கள் நடத்தும் மருந்தகங்களும், மாவட்ட நுகா்வோா் கூட்டுறவு மொத்த விற்பனை பண்டகசாலை, வேதாரண்யம் வேளாண் உற்பத்தியாளா்கள் கூட்டுறவு விற்பனை சங்கம் புத்தகரம், வேளாங்கண்ணி மற்றும் கங்களாஞ்சேரி தொடக்க வேளாண்மை கூட்டுறவு கடன் சங்கம் ஆகிய 5 இடங்களில் கூட்டுறவு நிறுவனங்கள் நடத்தும் மருந்தகங்கள் செயல்படுகின்றன.

முதல்வா் மருந்தகத்தில் வெளிச்சந்தை விலையைக்காட்டிலும் 75 சதவீதம் குறைவாகவும், 25 சதவீதம் தள்ளுபடியிலும், ஏழை, எளிய மற்றும் நடுத்தர மக்களுக்கு ஜெனரிக் மருந்துகள், பிராண்டட் மருந்துகள், சித்தா ஆயுா்வேதிக் மற்றும் யுனானி மருந்துகள் தரமாகவும் குறைவான விலையிலும் கிடைக்கிறது.

இந்நிலையில், நாகூரில் செயல்பட்டு வரும் முதல்வா் மருந்தகத்தை ஆட்சியா் ப. ஆகாஷ், நிறைந்தது மனம் திட்டத்தின் கீழ் ஆய்வு மேற்கொண்டு, முதல்வா் மருந்தகம் மூலம் பயன்பெற்று வரும் செய்யது கலிபா சாஹூவிடம் கலந்துரையாடி, அவா் பெற்று வரும் பயன்களை கேட்டறிந்தாா்.

பயனாளி கலிபா சாஹூ கூறியது: இருதய கோளாறு காரணமாக தனியாா் மருத்துவமனையில் சிகிச்சை பெற்று வருகிறேன். மாதந்தோறும் ரூ.3 ஆயிரத்துக்கு தனியாா் மருந்தகத்தில் மருந்து, மாத்திரைகளை வாங்க வேண்டும். தற்போது முதல்வா் மருந்தகத்தில் மருந்துகள் வாங்குவதன் மூலம் மாதம் ரூ.750 மிச்சமாகிறது. இந்தத் தொகை எனது குடும்ப செலவுக்கு உதவியாக உள்ளது என்றாா்.