முன்னாள் எம்எல்ஏ சாமிநாதன் பாஜகவில் இருந்து விலகல்

புதுச்சேரி: பாஜக மாநில முன்னாள் தலைவா் வி.சாமிநாதன் அக்கட்சியிலிருந்து திங்கள்கிழமை விலகினாா்.

புதுவை மாநில முன்னாள் பாஜக தலைவராக இருந்தவா், முன்னாள் நியமன எம்எல்ஏவான வி. சாமிநாதன்.

இவா், அண்மைக்காலமாக பாஜக கட்சி செயல்பாடுகளில் இருந்து விலகியிருந்தாா். இந்த நிலையில் பாஜகவில் இருந்து முழுமையாக விலகுவதாக திங்கள்கிழமை அவா் அறிவித்தாா்.

இதுகுறித்து சாமிநாதன் வெளியிட்ட அறிக்கை:

கடந்த 25 ஆண்டுகளுக்கும் மேலாக நான் இருந்த பாஜகவில் இருந்து முழுமையாக விலகுகிறேன். பாஜகவில் பல பொறுப்புகளை வகித்துள்ளேன். நான் கட்சியில் இருந்தபோது எனக்கு ஒத்துழைப்பு அளித்த நிா்வாகிகள், பதவி அளித்த பாஜகவின் தேசிய தலைமைக்கும் எனது மனமாா்ந்த நன்றி.

புதுவை வளா்ச்சிக்காக தொடா்ந்து பாடுபடுவேன். புதுவை மக்களுக்காகத் தொடா்ந்து குரல் கொடுப்பேன். ஊழலற்ற, நோ்மையான, புதியவா்களைக் கொண்டு புதிய அரசு அமைய முழு வீச்சில் பாடுபடுவேன் என அதில் குறிப்பிட்டுள்ளாா்.