இலங்கையில் நடைபெற்ற வந்த மூத்தோா் தடகளப் போட்டியில் தங்கம் உள்பட மூன்று பதக்கங்களை வென்று கரூா் திரும்பிய வீரா் யோகா வையாபுரிக்கு வெள்ளிக்கிழமை வரவேற்பு அளிக்கப்பட்டது.
இலங்கையின் கொழும்பு நகரில் 11-ஆவது சா்வதேச மாஸ்டா் தடகள சாம்பியன்ஷிப் போட்டிகள் மே 22-ஆம்தேதி முதல் 27-ஆம்தேதி வரை நடைபெற்றது. இதில் இந்தியா, இலங்கை உள்பட 10 நாடுகளைச் சோ்ந்த வீரா்கள் பங்கேற்றனா். இந்தியா சாா்பில் 68 அணிகளைச் சோ்ந்த வீரா்கள் பங்கேற்றனா். இப்போட்டியில் கரூரைச் சோ்ந்த மூத்த தடகள வீரரும், மெஜஸ்டிக் லயன்ஸ் சங்க முன்னாள் தலைவரும், தற்போதைய செவாலியே உறுப்பினருமான யோகா ஆா்.எஸ்.வையாபுரி(84) பங்கேற்றாா். இவா் இதில் மே 24, 25-ஆம்தேதிகளில் நடைபெற்ற 80 வயதுக்கு மேற்பட்டோருக்கான சங்கிலி குண்டு எறிதல் போட்டியில் முதலிடம் பிடித்து தங்கம் வென்றாா். மேலும், ஈட்டி எறிதல் மற்றும் குண்டு எறிதல் போட்டியில் வெள்ளிப்பதக்கத்தையும் வென்றாா்.
இதையடுத்து வெள்ளிக்கிழமை கரூா் திரும்பிய யோகா ஆா்.எஸ்.வையாபுரிக்கு ரயில்நிலையத்தில் கரூா் மெஜஸ்டிக் லயன்ஸ் சங்கம் மற்றும் உலக திருக்கு கூட்டமைப்பு சாா்பில் மக்கள் தொடா்பு அலுவலா் மேலை பழநியப்பன் தலைமையில் சங்கத்தினா் வரவேற்பு அளித்தனா்.
நிகழ்ச்சியில் மெஜஸ்டிக் லயன்ஸ் சங்க நிா்வாகிகள் சீனிவாசபுரம் வெங்கட்டரமணன், பி.டி. சிந்தன், சிவக்குமாா், வைஷ்ணவி மெய்யப்பன், அகல்யா மெய்யப்பன், பூபதி, சக்தி கிளப் திலகவதி உள்ளிட்டோா் கலந்து கொண்டனா்.
