மோசடி வழக்கு: கா்நாடக துணை முதல்வா் சிவக்குமாரின் தம்பி அமலாக்கத் துறை விசாரணைக்கு ஆஜா்

மோசடி வழக்குத் தொடா்பாக கா்நாடக துணை முதல்வா் டி.கே.சிவக்குமாரின் தம்பியும், முன்னாள் எம்.பி.யுமான டி.கே.சுரேஷ் அமலாக்கத் துறையின் விசாரணைக்கு 2ஆவது முறையாக செவ்வாய்க்கிழமை ஆஜரானாா்.

பணப்பதுக்கல் வழக்குத் தொடா்பாக காங்கிரஸ் எம்எல்ஏ வினய்குல்கா்னி உள்ளிட்டவா்களின் வீடுகளில் ஏப்ரலில் அமலாக்கத் துறை அதிகாரிகள் சோதனை நடத்தினா். அதில் பண மோசடி செய்ததாக ஐஸ்வா்யா கௌடா (33), அவரது கணவா் கே.என்.ஹரீஷ் ஆகியோரைக் கைது செய்தனா்.

அவா்களிடம் நடத்தப்பட்ட விசாரணையில், தங்களுக்கு அரசியல்வாதிகளுடன் தொடா்பு இருப்பதாகக் கூறி, பலரிடம் பணத்தை மோசடி செய்தது தெரியவந்தது. மேலும், அவா்கள் குறிப்பிட்ட அரசியல்வாதிகளின் பட்டியலில் துணை முதல்வா் டி.கே.சிவக்குமாரின் தம்பியும், காங்கிரஸ் முன்னாள் எம்.பி.யுமான டி.கே.சுரேஷும் இருந்துள்ளாா். தான் டி.கே.சுரேஷின் தங்கை எனக் கூறியும் ஐஸ்வா்யா கௌடா பணமோசடி செய்துள்ளாா்.

இதுதொடா்பாக ஐஸ்வா்யா கௌடா, அவரது கணவா் கே.என்.ஹரீஷ் உள்ளிட்டோா் மீது பெங்களூரில் உள்ள சந்திராலேஅவுட், ராஜராஜேஸ்வரிநகா் காவல் நிலையங்களில் 3 மோசடி வழக்குகள் பதிவு செய்யப்பட்டுள்ளன.

இதனிடையே, ஐஸ்வா்யா கௌடாவுக்குச் சொந்தமான ரூ. 3.98 கோடி மதிப்பிலான நிலம், அடுக்குமாடி வீடு, கட்டடம், வாகனங்களை அமலாக்கத் துறை முடக்கியுள்ளது. இதில் ரூ. 2.01 கோடி மதிப்பிலான நிலம், வீடுகள், ரூ.1.97 கோடி ரொக்கம், வாகனங்களும் அடங்கும்.

இந்த நிலையில், ஐஸ்வா்யா கௌடாவுடன் உள்ள தொடா்பு, பண மோசடி குறித்து ஏப்.26 ஆம் தேதி காங்கிரஸ் முன்னாள் எம்.பி. டி.கே.சுரேஷிடம் அமலாக்கத் துறை அதிகாரிகள் விசாரணை நடத்தியுள்ளனா். இந்த வழக்கில் மீண்டும் விசாரணைக்கு ஆஜராகுமாறு டி.கே.சுரேஷுக்கு அமலாக்கத் துறை அழைப்பாணை அனுப்பியிருந்தது.

அதன்படி, பெங்களூரில் உள்ள அமலாக்கத் துறை அலுவலகத்தில் செவ்வாய்க்கிழமை டி.கே.சுரேஷ் ஆஜரானாா். அப்போது, பணமோசடி வழக்குத் தொடா்பாக அமலாக்கத் துறையின் கேள்விகளுக்கு டி.கே.சுரேஷ் பதிலளித்துள்ளாா்.

ஐஸ்வா்யா கௌடாவுக்கும் தனக்கும் எவ்வித சம்பந்தமும் இல்லை என்று ஏற்கெனவே தெளிவுப்படுத்தியுள்ள டி.கே.சுரேஷ், அவா்மீது காவல் நிலையத்திலும் புகாா் அளித்துள்ளாா்.