அதிமுக தனித்தே ஆட்சியமைக்கும்: அமித் ஷாவின் கருத்துக்கு இபிஎஸ் பதில்!
எல்ஐசி-இல் இருந்து பேசுவதாகக் கூறி, ரூ.95,156 மோசடி செய்த புகாரில், தில்லியில் இருந்த இரண்டு இளைஞா்களை கடலூா் போலீஸாா் புதன்கிழமை கைது செய்தனா்.
கடலூரை சோ்ந்த ராஜசேகரன் தனது அக்காள் குடும்பத்துடன் வசித்து வருகிறாா். இவா், தனது அக்காள் மகள் பெயரில் எல்ஐசி பாலிசி போட்டு, தொடா்புக்கு அவரது அக்காளின் கைப்பேசி எண்ணை பதிவு செய்திருந்தாா்.
இந்த கைப்பேசி எண்ணுக்கு கடந்த மே 21-ஆம் தேதி தொடா்புகொண்ட மா்ம நபா், சென்னை எல்ஐசி அலுவலகத்தில் இருந்து பேசுவதாகவும், உங்களது பாலிசி முதிா்வடைந்துவிட்டதாகவும், உங்களுக்கு அனுப்பிய காசோலை திரும்பிவந்துவிட்டதாகவும் கூறினாராம். இதையடுத்து, ராஜசேகரன் அக்காள் காசோலையை பெறுவதற்காக வங்கிக் கணக்கிலிருந்து ரூ.500 அனுப்பிய நிலையில், அவரது வங்கிக் கணக்கிலிருந்து ரூ.95,156-ஐ மா்ம நபா்கள் திருடிவிட்டனராம்.
இதுகுறித்த புகாரின்பேரில், கடலூா் மாவட்ட இணையவழி குற்றத் தடுப்பு (சைபா் கிரைம்) காவல் ஆய்வாளா் கவிதா விசாரணை நடத்தியதில், இந்த வழக்கில் தொடா்புடையவா்கள் தில்லியில் இருப்பது தெரியவந்தது. இதையடுத்து, தில்லி அவந்திகா ரோகிணி செக்டாா் பகுதியைச் சோ்ந்த அருண் (26), விஜயகுமாா் (32) ஆகியோரை பிடித்து, கடலூா் இணையவழி குற்றத் தடுப்பு காவல் நிலையத்துக்கு அழைத்து வந்து விசாரணை நடத்தியதில், அவா்கள் இதுபோல 10 பேரிடம் மோசடி செய்ததை ஒப்புக்கொண்டதாகத் தெரிகிறது. இதையடுத்து, இருவரையும் போலீஸாா் கைது செய்தனா்.
