வடகாடு மோதல் சம்பவத்தில் கைது நடவடிக்கையை கைவிட வேண்டும்

புதுக்கோட்டை மாவட்டம், ஆலங்குடி அருகேயுள்ள வடகாடு மோதல் சம்பவத்தில் வன்கொடுமை வழக்கில் இளைஞா்களை கைது செய்யும் நடவடிக்கையை போலீஸாா் கைவிட வேண்டும் என்றாா் தமிழா் தேசம் கட்சியின் தலைவா் கே.கே.செல்வக்குமாா்.

வடகாடு மோதல் சம்பவத்தில் வன்கொடுமை வழக்கில் இளைஞா்கள் கைது செய்யப்படுவதைக் கண்டித்து வடகாடு பெரியகடைவீதியில் தமிழா் தேசம் கட்சியின் சாா்பில் வியாழக்கிழமை மாலை ஆா்ப்பாட்டத்துக்கு ஏற்பாடு செய்யப்பட்டது. இதற்கு போலீஸாா் அனுமதி மறுத்ததால், அக்கட்சித் தலைவா் கே.கே.செல்வக்குமாா் தலைமையிலானோா் ஊா்வலமாகச் சென்று தனியாா் மண்டபத்தில் கண்டனக் கூட்டம் நடத்தினா்.

கூட்டத்தில் செல்வக்குமாா் பேசுகையில், மோதல் சம்பவத்தில் உண்மைக் குற்றவாளிகளை போலீஸாா் கைது செய்யாமல், பல அப்பாவி இளைஞா்களை வன்கொடுமை வழக்கில் கைது செய்துள்ளனா். மேலும் பல இளைஞா்களை வன்கொடுமை வழக்கில் கைது செய்யும் நடவடிக்கையில் போலீஸாா் ஈடுபட்டுள்ளனா். இளைஞா்கள் மீது போடப்பட்ட வன்கொடுமை வழக்குகளை திரும்ப பெறுவதோடு, தொடா் கைது நடவடிக்கையையும் போலீஸாா் கைவிட வேண்டும் என்றாா்.