தருமபுரி மாவட்டம், பாலக்கோடு பகுதிகளில் உணவு பாதுகாப்பு விதிமுறைகளை பின்பற்றாத 5 கடைகளுக்கு அபராதம் விதிக்கப்பட்டது.
பாலக்கோடு பகுதியில் புலிகரை, வெள்ளிச்சந்தை, பெங்களூரு புதிய தேசிய நெடுஞ்சாலை, தக்காளி சந்தை, தருமபுரி சாலை, பாப்பாரப்பட்டி பிரிவு சாலை, எம்.ஜி.சாலை, புறவழிச் சாலை, பேருந்து நிலையம் உள்ளிட்ட பகுதிகளில் இயங்கும் மளிகைக் கடைகள், பேக்கரிகள், உணவகங்கள், தேநீா் கடைகளில் உணவு பாதுகாப்புத் துறை அலுவலா்கள் புதன்கிழமை அதிரடி சோதனை நடத்தினா்.
தருமபுரி உணவு பாதுகாப்பு துறை மாவட்ட நியமன அலுவலா் ஏ.பானுசுஜாதா, தலைமையில் வட்டார உணவு பாதுகாப்பு அலுவலா்கள் நந்தகோபால், திருப்பதி, அருண் உள்ளிட்ட குழுவினா் இச்சோதனையில் ஈடுபட்டனா். ஆய்வின்போது கடைகளில் தடை செய்யப்பட்ட புகையிலைப் பொருள்கள், பொட்டலம் இடப்பட்ட உணவுப் பொருள்கள், திண்பண்டம் பாக்கெட்டுகள், குளிா்பானங்களில் உள்ள காலாவதி தேதி, தேயிலை, உணவுப் பொருள்களின் தரம் ஆகியவற்றை ஆய்வு செய்தனா்.
சமையல் எண்ணெய் பயன்பாடு, அச்சிடப்பட்ட செய்தித்தாள்களில் எண்ணெய் பலகாரம் வழங்குதல், பொட்டலமிடுதல், காட்சிப்படுத்துதல் ஆகியவற்றை அறவே தவிா்த்தல் தல் குறித்தும், பின்பற்ற வேண்டிய வழிமுறைகள் குறித்தும் கடை உரிமையாளா்களுக்கு விழிப்புணா்வு ஏற்படுத்தினா். இந்த ஆய்வின்போது 2 கடைகளில் இருந்து மட்டும் பூஞ்சை பாதிப்புக்குள்ளாகிய 30 கிலோ தா்ப்பூசணி பழங்கள் பறிமுதல் செய்து அப்புறப்படுத்தப்பட்டது.
அதுபோல பேருந்து நிலையத்தில் 2 கடைகளில் உரிய விவரங்கள் அச்சிடப்படாமல் விற்பனைக்கு வைத்திருந்த பேரிச்சம்பழம் பாக்கெட்டுகள், தின்பண்டங்கள் என 5 கிலோ உணவுப் பொருள்கள் பறிமுதல் செய்யப்பட்டு அகற்றப்பட்டது. சம்பந்தப்பட்ட 2 கடை உரிமையாளருக்கும் தலா ரூ. 1000 அபராதம் விதித்து உரிய விவரங்கள் அச்சிடப்பட்ட பொருள்களை விற்பனை செய்யுமாறு அறிவுறுத்தப்பட்டது.
இதுபோல புலிகரையில் ஓா் உணவகத்தில் காலாவதியான மசாலா பொருள்கள், காகித இலைகள் பறிமுதல் செய்யப்பட்டன. மேலும் பேகாரள்ளி செல்லும் சாலையில் 2 துரித உணவு இறைச்சிக் கடைகளில் குளிா்பதனப் பெட்டியில் இருப்பு வைக்கப்பட்டிருந்த பழைய இறைச்சி, பலமுறை பயன்படுத்திய சமையல் எண்ணெய், செயற்கை நிறமூட்டி, நெகிழிப் பைகள், நெகிழி குவளைகள் உள்ளிட்டவற்றை அதிகாரிகள் பறிமுதல் செய்து மூன்று கடை உரிமையாளா்களுக்கும் உடனடி அபராதமாக தலா ரூ. 1000 விதிக்கப்பட்டது.
